Директорката на даночната администрација на Албанија, Делина Ибрахимај денеска оствари средба со директорката на Управата за јавни приходи (УЈП), Сања Лукаревска. Во фокусот беше начинот на функционирање на мерката „Мој ДДВ“, но и на целокупниот оперативен систем поради заинтересираноста на западниот сосед за имплементација на реформата.
„Мој ДДВ ги покажува добрите резултати и надвор од нашата држава“, напиша Лукаревска на Фејсбук.
Услугата „Мој ДДВ“ која почна од 1 јули лани беше ставена во функција на борба со даночната евазија и беше претставена како проект со кој граѓаните ќе бидат „инспектори“ со скенирање на фискални сметки за купените производи. Дел од нив добија поврат од 15 отсто од Данокот на додадена вредност за месеците јули, август и септември, а исплата за последното тримесечје од 2019 година е најавена во февруари.
Управата за јавни приходи на последниот ден од старата година соопшти дека во периодот октомври – декември биле скенирани 28,948,878 милиони фискални сметки преку кои е остварен промет од 14.301.474.854 милијарди денари. Вкуп
Мобилната апликација на почеток на проектот, според УЈП, беше симната од околу 58.000 лица, бројка што во второто полугодие на 2019 година се зголеми со повеќе од двојно.
На средината од минатиот месец почна и наградната игра „МојДДВ, МојаНаграда“ што е најавена дека ќе трае една година. Извлекувањето на добитниците се извршува со електронски генератор по случаен избор. Предвидени се 1.468 награди од 1.000 денари, 1.101 награда од 2.000 денари, 1.101 награда од 3.000 денари , односно секој ден ќе се доделуваат по 10 награди и тоа четири од 1.000 денари, три од 2.000 денари и три од 3.000 денари. Секој месец ќе се доделуваат 15 награди од 100.000 денари или вкупно за целото времетраење на играта 180 награди од 100.000 денари. Има и две главни премии од 3.000.000 денари.