„Го укинуваме прогресивното оданочување, но не се откажуваме од него. Работиме на нов модел кој ќе биде во насока да се опфатат сите приходи во едно домаќинство. Јас не сум против прогресивното оданочување, но, за да зборуваме за оданочување на богатите прво треба да ги дефинираме кои се тие, да се утврдат прагови кои ќе имаат ефект па дури потоа да ги оданочиме“, вели директорката на Управата за јавни приходи и заменичка претседател на СДСМ, Сања Лукаревска во интервју за порталот Локално.
Лукаревска додава дека „треба да креираме соодветен модел, добро креирано даночно решение носи и даночни придобивки“.
За резултатите на институцијата која ја предводи вели дека е задоволна од наплатата на даноците, и во однос на планот и во однос на 2021 година.
„За периодот јануари-декември заклучно со 27.12.2022 година, наплатата на приходите е за 17,36 проценти повисока, во однос на наплатата во истиот период од 2021 година. За периодот од јануари до 27 – ми декември 2022 година, наплатен е износ од 102,8 милијарди денари, додека во истиот период лани е наплатен износ од 87,6 милијарди денари. Годинава, споредбено со лани, имаме повисока наплата кај данокот на добивка за 44,88 проценти, повисока наплата кај данокот на личен доход за 16,93 проценти и повисока наплата кај данокот на додадена вредност за 12,3 проценти“, истакнува таа.
Во однос на даночната реформа и обвинувањата на опозицијата дека таа е за полнење на испразнетиот буџет, Лукаревска е децидна дека идеално решение нема, „но ние треба да го избереме најсоодветното“.
„Со прифатените измени се прошири даночната база преку таргетирање на даночните ослободувања и олеснувања во постојниот данок на личен доход со што се обезбедува поголема праведност на даночниот систем, како и правична распределба на даночниот товар по основ на данок на личен доход од труд и доход од капитал. Во однос на Данокот на добивка, предложените измени и дополнувања на законот треба да придонесат кон намалување на административниот товар на даночните обврзници и на УЈП како и воспоставување на неутрален даночен систем“, вели директорката на УЈП.
За падот на рејтингот на СДСМ според последните анкети, заменик претседателка на владејачката партија вели дека пораките на граѓаните треба да се земат сериозно во предвид, и дека во СДСМ, и таа лично, тоа го прават.
„Ако внимателно се анализира анкетата, од неа може да се извлечат заклучоци за расположението на граѓаните во септември и октомври 2022 година. Тоа е само неколку месеци по вревата и ширењето на лажни вести за францускиот предлог, кога последиците од глобалната економска и енергетска криза најмногу се чувствуваа. Сега да се направи анкета сигурно дека ќе има одредени разлики“, тврди во интервјуто Лукаревска.