Oткако претседателот Николас Мадуро прогласи вонредна состојба во Венецуела, во Каракас излегоа на протести и провладини и антивладини демонстранти.
Објаснувајќи ја својата одлука, Мадуро рече дека тоа го прави со цел да се отстранат внатрешните и надворешните агресори против Венецуела.
Тој нареди и воени вежби како подготовна за секаков вид сценарија, вклучувајќи и инвазија од странство.
И додека провладините поддржувачи бараат промени во Уставот, антивладините демонстратори го обвинуваат дека тој ја зголемувал моќта во време кога земјата се распаѓала. Најгласно се протестира против здравствениот систем како и “недостатокот од храна“.
CNN пренесува анкета според која, околу 70 отсто од државјаните на Венецуела сметаат дека Мадуро мора да замине од власт годинава.
Опозицијата, која пак во декември го освои Националното Собрание, бара референдум на кој ќе се гласа против претседателот.
Заменик-претседателот на земјата, Аристобуло Истуриз ја отфрли оваа можност, обвинувајќи ја опозицијата дека манипулира со сите свои обиди против првиот човек на земјата.
„Мадуро нема да си замине поради референдумот. Заборавете на тоа, нема да има такво нешто“, порача Истуриз.
Венецуела во моментов е во висока инфлација предизвикана од падот на цената на нафтата, што резултираше со хроничен недостаток на добра, медицина и електрична енергија а оттаму и политичките немири.
Мадуро е наследник на Хуго Чавез, кој почина од рак во 2013 година.