Голем пожар во магацин за складирање сулфур утрово предизвика итна евакуација во Порт Аделаид, во Јужна Австралија, откако густ и отровен чад се прошири низ околните подрачја.
На жителите на Порт Аделаид во близина на фабриката за ѓубрива „Ауризон“ им е наредено веднаш да го напуштат подрачјето.
Двајца работници веќе се пренесени во болница, но нивната здравствена состојба засега не е позната.
Наредбата за итно напуштање на подрачјето била издадена нешто по 11:40 часот, а надлежните прогласиле зона за евакуација во радиус од еден километар. Се верува дека магацинот бил полн со тони сулфур.
Пожарникарите не можат да користат вода за гаснење на пожарот, бидејќи предупредуваат дека тоа би предизвикало опасна хемиска реакција и би можело да доведе до експлозија.
На луѓето во зоната им е наредено веднаш да ја напуштат областа, а службите за итни случаи ја опишаа ситуацијата како „исклучително опасна“ и ги повикаа граѓаните да не влегуваат во подрачјето под никакви околности.
При согорување, сулфурот се претвора во сулфур диоксид – гас со силен и непријатен мирис, кој може да биде опасен по здравјето.
Овој гас може да предизвика сериозна иритација на дишните патишта, отежнато дишење и чувство на печење во носот и во грлото. Директната изложеност може да предизвика наталожување течност во белите дробови и претставува опасност од задушување.
Надлежните нагласија дека луѓето со астма или со срцеви проблеми треба да ја избегнуваат областа.
Прогнозите се дека пожарот ќе продолжи да гори во поголемиот дел од денот.