Фондот за здравство е за едни мајка, а за други маќеа. Вака ја започна својата приказна триесетгодишната Сандра Ј. Од Скопје. Таа е тетка на седумгодишната Јована, за која се грижи како мајка, откога ја напуштила нејзината мајка.

Сандра вели дека Јована ја има истата дијагноза како и Јана која доби одобрение од Фондот за рехабилитација во Германија, епилепсија и церебрална парализа.

Но, Јована не може да добие конзилијарно мислење од лекарите на детска клиника за лекување надвор од државата. Од тие причини девојчето веќе шест години се лекува во Љубљана на сопствен трошок на семејството.

Сандра вели дека за овие шест години продале имот, стан, злато, а лекувањето до сега ги чинело повеќе од 50 000 евра.

„Нема веќе што да продавам. Уште душата ми остана. Кој сака да ја купи з а да го однесам на контрола во Љубљана моето дете“, вели разочарано оваа млада жена.

Таа раскажува дека цела година не ја однеле на контрола малата Јована бидејќи веќе немаат што да продаваат. Лихвари заработуваат на нивната мака. Вели дека не е вистина дека сите деца добиваат конзилијарно мислење за странство од детската клиника, како што вчера во изјава за НОВА, рече директорката Аспазија Софијанова. Таа вели дека токму директорката на Клиниката за детски болести и рекла дека, бидејќи имале собирано донации не им треба конзилијарно мислење и одобрение од Фондот.

„А, докторката по која трчав и ја молев за конзилијарно мислење за Јована пак, ми рече, таму каде што си нашла лек, таму оди си“, раскажува за НОВА, Сандра.

Таа е револтирана што семејството Грковски не ги стопирале донациите, а од Фондот добиле 30 000 евра за рехабилитација.

„Зарем ние сме луди што го продадовме имотот и го однесовме моето дете на лекување во Љубљана. Ама ете, некој си може ем донации, ем Фондот да им покрие се. Сега ме интересира дали ќе се освестат и „маќеите“ за нашето дете“, прашува Сандра.

Од Фондот соопштија дека малата Јана е испратена на болничко лекување во Германија во законски спроведена процедура. На Клиниката за детски болести пак велат дека не постои застој или селекција на пациентите кои се праќаат на понатамошен третман.

„Сакаме да нагласиме уште еднаш дека како Клиника секогаш се залагаме да го направиме најдоброто за нашите пациенти во рамките на нашите можности. Доколку истите тие можности за лекување овде се исцрпени, пациентот се проследува на понатамошни иследувања надвор од државата. Секако се соочуваме секојдневно со родители кои инсистираат по секоја цена нивното дете да замине во странство, на нас останува да процениме дали истиот третман би го добиле и кај нас и потоа истото да им го објасниме и нив. За оние деца кои имаат потреба од понатамошен третман во странство, ние правиме конзилијарни мислења и стоиме зад нив како лекари. Принципот за праќање оди според индикацијата, а не како што се имплицра ,,врските,,. Доказ за тоа се десетицитие деца пратени на лекување надвор и многу поголемиот број излекувани на Детската клиника“, се вели во одговорот од клиниката.

Во случајот со Јована резултати дава и помага единствено Кетогената диета која не с е применува во Македонија. Сандра се надева дека сега, кога некои работи излегоа на виделина, надлежните и докторите од клиниката ќе најдат начин да и помогнат и на малата Јована.