Над 200 милиони евра се обезбедени од ЕБОР за реализација на регионален проект за управување со отпад и за проектот за изградба на делница од автопатот Скопје-Блаце, соопшти Министерството за финансии.
Предлог законите за обезбедување на средствата од оваа меѓународна финансиска институција предложени од Министерството за финансии, биле прифатени на вчерашната владина седница. Со предлог законот за гаранција на Северна Македонија на обврските по Договорот за заем за финансирање на изградбата на автопат од Скопје до границата со Косово, се предвидува да се обезбедат 167,6 милиони евра од ЕБОР, кои се обезбедуваат со рок на отплата од 16 години, со грејс период од 4 години и каматна стапка која е варијабилна, објави Министерството.
Со ова се комплетира финансиската конструкција за изградба на делницата од автопатот Скопје – Блаце. Покрај средствата обезбедени од ЕБОР, изградбата ќе се финансира и со грант средства во износ од 26,5 милиони евра. Со изградбата на втората подделница која се однесува на останатиот дел од автопатот Блаце – Скопје, значително ќе се подобри мобилноста и трговската размена, ќе се подобри безбедноста на патот и ќе се скрати времето на патување, велат од Министерството за финансии.
Во однос на управувањето со отпад планот е да се развијат регионални системи за управување со отпад во Југоисточниот, Вардарски, Пелагониски, Југозападен и Полошки регион од државата.
ЕБОР во изминативе 30 години има инвестирано над 2,2 милијарди евра во 159 проекти во земјава.