Денеска во Скопје почна конференцијата на НАТО комуникатори, на која ќе учествуваат околу 300 експерти од оваа област. Отварајќи ја конференцијата премиерот Димитар Ковачевски рече дека за Македонија како најмлада членка на НАТО ваквите настани се од голема важност „бидејќи тие го детерминираат нашето натамошно внатрешно организирање и делување на полето на стратешките комуникации“.
„Воените и политичките активности се тесно врзани со нивната комуникација и со умешноста истите да ги доближиме до граѓаните. Од комуникациите и од вашата отвореност зависи дали и како граѓаните ќе разберат на кои начини работиме на зачувување на нивната безбедност“, им порача Ковачевски на учесниците на конференцијата.
„Во ерата на дезинформациите и хибридните напади токму стратешките комуникации имаат најважна улога затоа што овозможуваат точни и проверени информации до граѓаните наспроти дезинформациите чија цел е да внесат немир и страв“, рече тој.
Премиерот нагласи дека воената инвазија врз Украина од страна на Русија и огромниот наплив на дезинформации околу истата, покажа дека комуникациите можат да имаат сериозно раздорно влијание против кое мора да се бориме. „Точно е дека Украина во овој момент успешно се справува со информациската војна, за што од сите нас има поддршка, но токму таа информациска војна ни покажува колкава е улогата на комуникациите во стабилноста на една земја и еден регион“, истакна Ковачевски.
Министерката за одбрана Славјанка Петровска рече дека оваа конференција за првпат се одржува во Северна Македонија, и праќа политичка порака дека НАТО е воено-политички сојуз кој ги следи безбедносните предизвици од сите аспекти. „24 февруари ни покажа дека она што го сметавме за невозможно за жал стана реалност. Воена агресија на една држава врз друга суверена држава, проследена со информациска војна која има за цел да ја поткопа довербата во клучните цивилизациски вредности и да го поткопа нашиот кредибилитет како Алијанса. Огромна е одговорноста на НАТО комуникаторите во оваа војна да ја извојуваат победата на вистината“, рече Петровска.
Таа најави дека Министерството за одбрана е во процес на формирање на Центар за односи со јавност чија главна цел е токму борбата со дезинформации.
Конференцијата со свој говор ја поздрави и помошничката генерален секретар на НАТО за јавна дипломатија Бајба Браже а видео-обраќања имаа и командантот на Сојузничката команда за операции, генерал Кристофер Каволи и командантот на Сојузничката команда за трансформација, генерал Филип Лавињ. (Р.Н.)