САД денес поднесуваат нацрт-резолуција во ОН што користи помалку критички јазик кон целосната инвазија на Русија врз Украина од нацрт-резолуцијата што ја предложија Европската Унија и Украина.
Имено, како што дознава „Слободен печат“, коспонзори на американската резолуцијата се и Грузија, Унгарија, Израел, но и Македонија. Резолуци на истата тема, но со построга реторика кон Русија, ќе предложат денес во исто време заедно Франција и Германија.
Она што е интересно е дека поголемиот дел од ЕУ членките ќе бидат за таа резолуција. Но, веројатно Словачка, Италија како ЕУ членки, и кандидатите за ЕУ, Србија, Црна Гора и Турција, ќе ја поддржат резолуцијата на САД.
Двата нацрти беа предложени за одбележување на третата годишнина од руската инвазија врз Украина на 24 февруари, кога Генералното собрание на ОН треба да гласа за резолуциите.
Нацртот на САД, предложен на 21 февруари, жали за „трагичната загуба на животи во текот на руско-украинскиот конфликт“, повикува на брз крај и повикува на траен мир. Но, не ја споменува територијата окупирана од Русија и не ја издвојува Москва како извор на конфликтот.
Американскиот државен секретар Марко Рубио ја нарече резолуцијата „едноставна и историска“ и ги повика членките на ОН да ја поддржат „со цел да се зацрта патот кон мирот“.
„Оваа резолуција е во согласност со ставот на претседателот Трамп дека ОН мора да се вратат на својата цел за која се основани, како што е содржана во Повелбата на ОН, за одржување на меѓународниот мир и безбедност, вклучително и преку мирно решавање на споровите“, рече Рубио во изјавата.
Спротивно на тоа, нацрт-резолуцијата од Европската Унија и Украина се однесува на „целосна инвазија на Украина од страна на Руската Федерација“ и бара итно и безусловно повлекување на сите сили на Москва.
Украинско-европскиот текст ја нагласува потребата да се удвојат дипломатските напори за завршување на војната оваа година, истовремено обвинувајќи ја Русија за инвазијата и е посветена на „територијалниот интегритет“ на Киев. Во текстот, исто така, се потсетува на потребата да се имплементираат сите претходни резолуции на собранието „усвоени како одговор на агресијата врз Украина“.
Нацрт-резолуциите циркулираа во седиштето на ОН во Њујорк во услови на јаз меѓу Соединетите Држави и Европа за тоа како да се преговара за крај на војната. Долгогодишната трансатлантска алијанса е потресена поради одлуката на администрацијата на Трамп да ги отвори преговорите со Русија во Саудиска Арабија без претставници на Украина и на Европската Унија на маса.
Инаку, генералното собрание стана најважното тело на ОН што се занимава со Украина. За разлика од Советот за безбедност на ОН, каде постојаните членки Велика Британија, Кина, Франција, Русија и САД имаат право на вето, ниту една земја членка нема право на вето на Генералното собрание.
Резолуциите донесени од 193-членото тело не се правно обврзувачки, но внимателно се следат низ целиот свет.