По пристигнувањето во Рим, претседателот на Република Северна Македонија, Стево Пендаровски оствари средба со италијанскиот претседател Серџо Матарела.
„На претседателот Серџо Матарела му пренесов дека Северна Македонија ја цени конструктивната и безрезервна поддршка од Италијанската Република на нашиот пат кон полноправно членство во EУ. Нашите две земји ги поврзува традиционално пријателство. Го продолжуваме политичкиот дијалог и ја унапредуваме билатералната соработка во сите области од заеднички интерес“ напиша по средбата Пендаровски на официјалниот Фејсбук профил.
На средбата Пендаровски добил ветување дека Италија ќе се заложи, процесите да се интензивираат за целиот Западен Балкан, вклучително и за Северна Македонија, која предолго чекала во чекалната на европските интеграции.
„Тоа е и во нивни интерес не само на државите кои се лоцирани во нашиот регион. Интересен детаљ е дека по 20 години, мислам до крајот на оваа година, вети дека ќе дојде во официјална посета на Северна Македонија, тоа е втора или трета посета на италијански претседател откако Македонија е независна држава“, изјави Пендаровски по средбата.
Претседателот Пендаровски во италијанската престолнина замина со бугарски државен авион, заедно со претседателот на Бугарија, Румен Радев кој беше во куса посета на скопскиот аеродром. Пред заминување двајцата претседатели порачаа дека заедничкото патување е добра основа да се продлабочи дијалогот меѓу Скопје и Софија.
Пендаровски во Рим ќе има средба и со папата Фарнциск. Повод за посетата на Рим е чествувањето на светите браќа Кирил и Методиј.