Здружението за социјални иновации „АРНО“ и Министерството за локална самоуправа, потпишаа договор за кофинансирање на проектот „SEEDs: Социјални претпријатија за економски развој и социјална инклузија“, кој е финансиран од ЕУ, во рамки на Програмата за прекугранична соработка меѓу Србија и Северна Македонија. Проектот е еден од седумте проекти коишто беа избрани на првиот повик од меѓугранична соработка меѓу двете земји за периодот од 2016 до 2020 година.
„Благодариме на државата за одобрените средства, навистина ни значи кофинансирањето и можноста да придонесеме кон развој на зелената и солидарната економија. Сигурни сме дека овој регион има многу што да понуди – потенцијалот на нашите две земји го знаеме затоа што работиме 8 години со партнерите „Траг Фондација“ на натпреварот за зелени идеи. Целта ќе ни биде да ги зајакнеме капацитетите и да ги инспирираме граѓаните да генерираат нови социјални и зелени бизниси, кои ќе придонесат за економски развој на регионот и вклучување на ранливите групи на граѓани во овие бизниси“, вели Ирина Јаневска, претседателка на „АРНО“.
Проектот вклучува активности за промоција на социјалните претпријатија од пограничниот регион, настани за нивно вмрежување, програми за јакнење на нивните капацитети (зелена академија), како и награди во натпревар за зелени бизниси.
Проектот ќе трае 18 месеци а ќе го спроведуваат партнерски организации од Македонија и Србија. (Р.Н.)