Македонија од денеска почнува со имунизација против ковид-19 на деца на возраст од 12 до 17 години чии родители/старатели се пријавиле на сајтот vakcinacija.mk. Според последните податоци од Министерството за здравство (МЗ), досега се пријавени околу 1.800 деца, а паралелно со нив ќе продолжи и вакцинација и на возрасното население.
Здравствените власти апелираат дека единствен начин за превенција од нов силен бран и ширење на опасниот делта сој е што помасовна имунизација. Од МЗ вчера информирaа дека кај нас се детектирани десетина случаи со делта сој и ниту еден од нив не бил вакциниран.
Според последната статистика што вчера ја објави МЗ, во претходното деноноќие бил регистриран 21 нов случај со ковид-19 од направени 3.358 тестови од кои 13 во Скопје, пет во Тетово и по еден во Гостивар, во Струмица и во Дебар. Во болниците во земјата се хоспитализирани 16 пациенти.
Вкупниот број на заразени од почетокот на епидемијата во земјава достигна 155.922 од
930.540 тестирања на ковид-19. Оздравени се 150.170, а починати 5.487. Вкупно активни се 265 случаи од кои најмногу во Скопје – 99, во Тетово – 83, во Гостивар – 15, во Куманово и во Кичево по 13, итн.