Селекторот на фудбалската репрезентација на Македонија, Игор Ангеловски не сака да препушти ништо на случајот. Повредата на Стефан Спировски и имобилизаторот што мора да го носи на десната го прават неизвесен настапот на вардаровиот играч во петок против Лихтенштајн во квалификациите за СП 2018. Тоа е причина за упатената покана и до Остоја Стјепановиќ за приклучување во националниот тим. Членот на полскиот прволигаш Вроцлав ја прифати, одговори со екпресно доаѓање во Скопје и ќе биде опција за мечот во петок (20,45 ч.) во Вадуц.
Спировски е под знак прашалник. Ангеловски ќе го поведе во Лихтенштајн, но последниот збор за него ќе го има делегатот на средбата. Првотимецот на македонскиот првак има скршеница на палецот на десната рака и принуден е да игра со заштита на дланката како мерка на претпазливост од евентуално влошување на состојбата. Очекувањата на лекарскиот тим на македонската репрезентација се дека скршеницата би требала да зарасне за три месеци и без компликации.
Репрезентацијата денеска одработи уште еден тренинг во низата на мини подготовките. За Вадуц ќе замине во четврток сабајле, а вечерта ќе има прилика да се „запознае“ со тревникот на „Реинпарк“ каде во петок ќе треба да се потврди како фаворит во желбата за премиерна победа во групата Г во мундијалските квалификации.
Правда ќе дели судиска четворка од Белгија на чело со Жонатан Лардо.
Македонија и Лихтенштајн досега одиграа пет меча. „Црвено-жолтите“ имаат четири победи, меѓу нив и најубедливата досега од 11:1 на 9 ноември во 1996 година, и реми (1:1) со вкупна гол разлика од 20:4.