Собранието денес со 94 гласа “за” го усвои барањето на Владата продолжување на кризната состојба на дел од јужната граница до 31 декември годинава. Барањето го поддржа и опозициската ВМРО-ДПМНЕ.
Според Владата рокот треба да биде продолжен поради зголемениот обем на влез и транзитирање на мигранти низ територијата на земјава и состојбата на јужната и на северната граница.
Министерот за внатрешни работи Оливер Спасовски смета дека одлуката е значајна пред се поради околностите поврзани со глобалниот проблем со мигрантската криза која не стивнува и може да ескалира во секој момент.
„Армијата, заедно со МВР, ќе може да учествува во обезбедување на државната граница со Република Грција каде што како што знаете имавме сериозен прилив на мигранти во изминатиов период“, изјави Спасовски.
И додека нашата Влада стравува дека повторно ќе има бран на бегалци, Организацијата за соработка и економски развој (ОЦДЕ) во денешниот свој извештај тврди дека не треба да има страв од нов наплив на бегалци во Европа.
Според ОЦДЕ пикот на хуманитарната криза на бегалците е завршен а сега приоритет е нивната интеграција која е вистински предизвик за националните политики, вели ОЦДЕ во својот годишен извештај.
Огромниот бран бегалци од крајот на 2015 година е намален веќе една година. Од почетокот на 2017 година имало 72.000 мигранти од Африка кои стасале на европските морски брегови а тоа е 12 пати помалку отколку во втората половина на 2015 година, вели ОЦДЕ.
Сепак, сите тие лица имаат намера да останат во Европа подолг период и затоа сега е време за фокусирање на начинот на кој може да им се помогне на тие луѓе за да можат тие да бидат дел од работниот пазар во Европа.
Во 2016 година ОЦДЕ регистрирала 1.6 милиони барања за азил, слично како и во 2015 година а од нив 1.5 милиониго добиле тој статус, вели извештајот.
Германија е земјата која, четврта година по ред, добила најмногу барања – 675.000 а потоа следат САД со 260.000 барања, Италија со 120.000 барања и Франција и Турција со околу 80.000 барања за азил. Азилантите доаѓаат пред се од Сирија, Авганистан и Ирак.