Вечерва во 20:30 часот симболично ќе бидат исклучени светилките во над 8.000 градови во преку 180 земји во светот, меѓу кои и во нашата земја, за испраќање силна порака за спас на планетата во рамки на глобалната еколошка акција „Час на планетата Земја“.
Од „Час на планетата Земја“ повикуваат, наместо од улиците, оваа година луѓето да се обединат во своите домови и заеднички да покажат дека не е време да се откажеме, туку можност да реагираме уште покреативно.
„Во период кога глобалниот биодиверзитет се намалува со невидени и алармантни стапки, додека паралелно на еден милион животински и растителни видови им се заканува целосно исчезнување од лицето на планетата, а Земјата е на чекор од уништување поради глобалното затоплување, сега е повеќе од потребно да се подигне свеста дека природата е фундаменталма основа за здрава планета и непосредно и најмоќно решение за спас од климатските промени“, информираат организаторите.
Во својата мисија, како што се наведува во соопштението, „Час на планетата Земја“ секогаш ја потенцира моќта на луѓето и затоа здравјето и благосостојбата на нивните поддржувачи секогаш биле на првото место.
По тој повод, вечерва и македонските пејачи и инфлуенсери во 20 часот, преку инстаграм сесија, ќе остварат заедничко онлајн дружење, а потоа во 20:30 часот заеднички ќе ги исклучат светилките со цел испраќање силна порака за спас на планетата.
„Ги повикуваме граѓаните и сите наши поддржувачи да ни се приклучат на едно и пол часовниот спектакл на нашиот инстаграм профил @earthhourmk, каде што ќе имаме можност заеднички да уживаме во настапите во мрак на нашите „Некст тајм“, ДНК, Антонија Гиговска, Иван Јованов, Огнен Здравковски, Теа Трајковска, а исто така ќе можеме да поразговараме и за климатските промени со Ване Марковски, Ирена Спировска, Татјана Алексиќ и многу други“, соопштија од иницијативата „Час на планетата Земја“ и испратија апел до другите естрадни личности да го прифатат овој еколошки предизвик.
Оттаму посочуваат дека сега е време за почитување на правилата и на солидарност. Мора, порачуваат, да се чуваме едни со други, мора да направиме нашиот глас да биде слушнат за посигурна, почиста и поздрава иднина за нас и идните генерации. Започнувајќи како симболичен настан во Сиднеј во далечната 2007 година, „Часот на планетата Земја“ сега се одбележува во повеќе од 180 земји и територии како глобален момент на солидарност за планетата.