„Литургија на помирување“ меѓу Српската православна црква и Македонската православна црква се оддржува од изутрина во 9 часот во Соборниот храм „Свети Сава“ во српската престолнина Белград.

Патријархот на СПЦ Порфириј утрово ја пречека македонската црковна делегација предводена од архиепископот Стефан во близина на храмот на „Свети Сава“ во Врачар. Во делегацијата на МПЦ се архиепископот Стефан, митрополитите Петар, Тимотеј, епископот Климент, Архимандритот Нектариј од манастирот „Свети Наум“, архимандритот Агатон од манастирот „Свети Пантелејмон“.

Со оваа литургија, практично, се воспоставува „литургиско и канонско општење“. Во соопштението на СПЦ беше наведено дека македонската црква се враќа во положба на „најширока автономија“ каква што и беше определена во 1959 година. Се искажала и подготвеност за дијалог за македонското барање да се уреди и конечниот статус на МПЦ-ОА.

Владиката Тимотеј, синодски портпарол на МПЦ-ОА, вчера изјави дека се очекува до крајот на месецов Српската православна црква да го испрати предлогот за автокефален статус на МПЦ до Вселенската патријаршија, по што треба да биде издаден Томосот за автокефалност.

-Постојат 9-10 точки кои треба да ги исполни една православна црква за да биде предложена од својата матична црква од која се одделува. Во конкретниот случај од Српската православна црква. СПЦ потоа да ја извести Цариградската патријаршија и останати православни цркви и во согласност со сите останати, да се издаде Томос. Томосот треба да го потпишат цариградскиот и српскиот патријарх. Тоа се надеваме дека ќе биде до крајот на мај, рече владиката Тимотеј.