Четириесет и пет македонски државјани се сопственици на 55 имоти во Дубаи чија вредност е проценета на 14 милиони долари покажаа последните документи кои протекоа од архивите на Обединетите Арапски Емирати. Податоците, кои датираат од 2020 година, ги доби американскиот Центар за напредни одбранбени студии, непрофитна организација која го истражува меѓународниот криминал и конфликти, а ги објави норвешкиот финансиски центар „Е24“, кој ја координираше истрагата за недвижниот имот.
Во протечените документи ги нема имињата на македонските државјани кои се сопственици на имот ниту пак е наведено дали станува збор за вили, станови, згради, деловен објект, или пак хотели хотелски соби или апартмани.
Она што е познато е дека просечната вредност на имотите е 258 илјади долари, повеќето се под таа вредност а вкупната вредност на имотот изнесува 0,11 отсто од македонскиот бруто домашен производ во 2020 година.
Домашните институции немаат прецизна бројка колку македонски државјани поседуваат имот во Дубаи и која е нивната вредност а тоа се должи на фактот што голем дел од нив се купени со трансакции од сметки во странство.
Од Управата за финансиско разузнавање соопштија дека согласно законот за спречување перење пари прибираат информации и кога има сомневање постапуваат.
Согласно законот за спречување перење пари и финансирање тероризам обврзани за доставување на информации се банки, менувачници, штедилници, адвокати, нотари. Станува збор за трансакции над 15 илјади евра во кеш или солемизација на имоти со вредност над 15 илјади евра. Таму каде што има сомнение за купување на имоти со средства кои се стекнати на нелегален начин, Управата за финансиско разување, како што велат оттаму, е должна да постапи. Меѓутоа, додаваат и дека информациите кои стигнуваат до Управата се од разузнавачки карактер и не може да бидат објавени во јавноста. (Р.Н.)