Министерот за економија Дритон Кучи и градоначалникот на Гостивар Невзат Бејта ја пресекоа црвената лента на отворањето на новиот ресторан „Ла Перла Грац“ во Австрија. Тие им беа специјални гости на денешното свечено отворање на двајцата сопственици – бизнисмени од Гостивар Нагип и Фарук Незири.
Оваа вест денеска е објавена на државната информативна агенција МИА, како и изјава од министерот Кучи, кој се надева дека двајцата браќа Незири ќе тргнат по стапките на Мајка Тереза и Ферид Мурад и ќе остават белег од својата работа.
„Многу наши сограѓани си заминаа од родните краеви и станаа модел за успех насекаде во светот. Мајка Тереза, Ферид Мурат, и многу други оставија свој белег со својата работа, и се надевам дека нивниот пример ќе го следат и Нагип и Фарук, кои се доста познати со своите кулинарски способности. Денес, сме овде во Грац на свечено пуштање во употреба на овој елитен ресторан и ова го правиме веднаш по пуштање во употреба на фабриката за амбалажирана вода Маја во Гари-Дебар и еден месец по настанот во тетовската слободна индустриска зона, каде што започна со работа една успешна американска компанија „Леар корпорејшен“ од САД, изјави министерот Кучи.
Тој додаде дека дијаспората од целиот свет ја имала и ќе ја има поддршката од Министерството за економија и Владата, каде и да се одлучат да инвестираат, во Македонија или во земјите во кои тие работат.
Инаку, за една од инвестициите со која се фали министерот Кучи, фабриката за амбалажирана вода Маја во селото Гари, хрватските медиуми денеска објавија дека инвестицијата не е хрватска, туку руска.