Почнувајќи од денес, 1. март, па сѐ до 31 март, кога се очекува да заврши вонредната состојба во Италија, нема да има повеќе ограничувања за влез во земјата, информираше Амбасадата на Италија.
Како што се наведува во соопштението, во Италија ќе може да се влезе и за туристички патувања, со приложување на Европскиот ковид сертификат, добиен по извршена вакцинација со една од вакцините одобрени од ЕМА.
Амбасадата, во оваа прилика, потсетува и дека Италија во Северна Македонија донираше 250.000 дози од вакцината Фајзер, што им овозможува на оние кои сè уште не го сториле тоа да го завршат циклусот, зголемувајќи ја заштитата на населението.
Алтернативно, во Италија ќе може да се влезе и со потврда/сертификат за оздравување или со прикажување негативен молекуларен или антигенски тест (од кој, во секој случај, се ослободени децата на возраст под 6 години).
Конечно, Италијанската амбасада известува дека при влез во земјата задолжително треба да се приложи и дигиталниот формулар за лоцирање на патници (PLF – Passenger Location Form).
Олеснетите мерки за влез во Италија ќе ги израдуваат секако и фановите на македонската фудбалска репрезентација којашто, за помалку од еден месец, ќе ѝ гостува на Италија во бараж мечот за пласман на СП.
Претставници на ФФМ вчера го посетија Палермо и стадионот на кој ќе се игра натпреварот.