Македонците во областа Голо, на албанско-македонска граница, и оваа зима не ги одминаа проблемите со кои се соочуваат по обилни снежни врнежи. По последниот снег, чија дебелина надминува 40 сантиметри, а на места е повисока, како и минусните температури, веќе трет ден се отсечени од светот.
Дополнителен проблем претставува и недостигот на електрична енергија што е присутен веќе трет ден. Во текот на ноќта и во утринските часови живата во термометарот паѓа и до -16 степени целзиусови, а вечерва и утре најава има за повисоки минусни температури, велат жителите.
Едмонд Османи, администратор на административната единица Требиште, рече дека во соработка со градоначалникот на општина Булќиза се прават максимални напори за надминување на проблемите.
Обилните снежни врнежи, поларниот студ и мразот го прават своето. Вложуваме максимални напори да се пробијат патиштата. Превземени се сите мерки и сме во служба на жителите за било каква потреба, изјави за МИА Османи.
Областа опфаќа 22 населени места со над 12.000 жители.