Четири деца од Специјалниот завод Демир Капија од денеска ќе бидат сместени во малиот групен дом во Тимјаник, неготинско. Со тоа од денеска овој мал дом ќе почне со работа.
„Недоразбирањата во Тимјаник се надминати, а децата преселени во малиот групен дом. Никогаш не се сомневав во хуманоста на нашите граѓани. Жителите ни дадоа поддршка на она што го правиме. Верувам Тимјаник ќе биде и ќе остане симбол на хуманоста на нашето општество, а жителите ќе се гордеат со тоа“, изјави министерката за труд и социјална политика Мила Царовска, која заедно со постојаната претставничка на ОН во земјава Луиза Винтон, претставникот на УНИЦЕФ Бенџамин Перкс и градоначалникот на Неготино, Тони Делков присуствуваа на отворањето.
Министерството за труд и социјална политика во соработка со УНИЦЕФ, Сојуз на Дефектолози и СЗ Демир Капија и изминатиот период интензивно работеше на подготовка на децата за преместување во алтернативни форми на згрижување. Во новиот мал групен дом децата ќе имаат 24 часовна поддршка од лични асистенти, специјализирани индивидуализирани програми за работа и дефектолошки третмани. Близината на училиштето и локалната заедница ќе им овозможи на овие деца полесно и побрзо да се вклопат во општеството.
„Со отворањето на малиот групен дом денес правиме нов чекор кон трансформација на големите институции и обезбедување семејна грижа за секое дете. Заедно со Владата и другите наши партнери секој ден сме се поблиску до остварувањето на заложбата на Владата за ставање крај на институционалната грижа за деца помали од три години до 2020 година.“ изјави Бенџамин Перкс, претставник на УНИЦЕФ во Македонија.
Деинституционализацијата преставува премин од социјална грижа во големи „безлични“ институции кон грижа во заедницата. Ова е првиот чекор кон градење похумано општество. Досега од Специјалниот завод Демир Капија се извадени вкупно седум деца.
„Деинституционализацијата е тежок збор но има убаво значење – а тоа е дека секој заслужува место кое ќе го вика ‘дома’. Да се обезбеди за сите деца и возрасни со попреченост да ги уживаат своите права, вклучувајќи го и правото да живеат во нормални домови во заедницата – ова е приоритет за УНДП и за целото семејство на Обединетите нации. Ние сме горди што ја поддржуваме Владата во спроведувањето на заложбата за деинституционализација”- изјави постојана координаторка на ООН и УНДП, Луиза Винтон.
На почетокот на јуни, по најавата дека во неготинското село ќе се гради ваков дом, жителите организираа протести. На еден од нив дојде и министерката за труд и социјална политика Мила Царовска заедно со претставници на УНИЦЕФ и на ОН, кога жителите во зовриена атмосфера упатија навреди на сметка на децата кои треба да бидат сместени во домот и со барање, тие да останат „понастрана од нивните деца“.
Градоначалникот на Неготино, Тони Делков кој тој ден беше отсутен, во изјава за НОВА рече дека жителите на Тимјаник биле погрешно информирани за децата кои треба да бидат донесени од Заводот во Демир Капија и дека не знае кој го направил плакатот со кој жителите се повикуваат на бојкот, но веќе имаат некакви сознанија кој има давал погрешни информации на жителите на Тимјаник.
Потоа тензиите се смирија, а на крајот на јуни Царовска беше во Тимјаник на средба со жителите, по што соопшти дека има согласност да се гради мал групен дом за децата со попреченост.