Во Агенцијата за лекови и медицински средства, МАЛМЕД се пријавни вкупно 231 несакан ефект по примени вакцини против ковид-19, а двајца лекари во април и септември пријавиле несакани реакции за смртен случај поврзани со употребата на вакцините, изјави раководителката на сектор во МАЛМЕД Меријем Хаџихамза на денешна онлајн средба со новинарите.

На средбата присуствуваше и в.д. директорот Љирим Шабани.

Двете пријави за смртните случаи се однесуваат на лица на 53 и 85 годишна возраст, но дека за нив не е докажана поврзаност со употреба на вакцините, односно дека станува збор за сомнежи и неофицијални податоци.

Хаџихамза наведе дека пријавите на натамошна обработка се испратени во мониторинг центарот Упсала и во Институтот за јавно здравје, а заедно со Шабани посочија дека ефектите од вакцинацијата биле далеку поголеми.

– Кога еден лек во случајов вакцина ќе се употреби, ако се пријави некое несакано дејство, тоа не значи дека е последична реакција од примената на вакцината – рече Хаџихамза.

Според неа, еден од пациентите имал многу коморбидитети и лично се сомнева оти причината за смртта била употребата на вакцината, но наведе дека тоа треба да го кажат „луѓето кои за тоа имаат компетенции.“

Во врска со пријавувањето на несакани реакции од вакцините против ковид, досега во МАЛМЕД добиле 133 пријави од лекари, 88 од фармацевти и 10 од други здравствени работници, рече Шабани.

Шабани рече дека пријавените несакани ефекти од сите вакцини се во рамки на предвидливите кои се наведени во упатствата, како главоболка, гадење, вртоглавица, болка во екстремитети, рамо, на местото на апликација.