Заменик претседателот на Владата за европски прашања, Бојан Маричиќ, денеска присуствуваше на заедничката седница на Комисијата за европски прашања и Националниот совет за евроинтеграции, на која се расправаше за Извештајот на Европска Комисија за Северна Македонија за 2022 година.
„Сметам дека ова е вистинското место каде треба да го дискутираме Извештајот и од каде треба да доаѓаат пораките за тоа како понатаму, особено сега, кога сме земја преговарач за полноправно членство во Европската Унија. Затоа како главен преговарач ќе иницирам воспоставување на рамка за соработка со Собранието и зајакнување на неговата улога во процесот“, рече Маричиќ.
Тој додаде дека очекува целосна посветеност од страна на пратениците и подадена рака за заеднички да ги надминуваат предизвиците кои следат на евроинтегративниот пат.
„Само обединети ќе можеме да ја исполниме оваа национална задача. Процесот на преговори е процес на целокупна општествена трансформација која допира до сите нас и до сите аспекти на општественото живеење. Затоа, верувам дека само со национален консензус и максимално вложување на Владата како носител на преговорите, но и администрацијата која е ’рбетниот столб на процесот, граѓанското општество, Собранието, бизнисите, академската заедница и сите други засегнати страни ќе ја исполниме заложбата да бидеме подготвени за полноправно членство во Унијата до 2030 година“, порача Маричиќ.
Евроамбасадорот Гир ги поздрави чекорите на Владата во решавањето на отворените прашања со соседите и во спроведување реформи кои земјава ја ставија на вистинскиот пат за остварување на една од стратешките приоритети.
Маричиќ во своето обраќање се осврна и на направената анализа на Извештајот од страна на Секретаријатот за европски прашања и рече дека има позитивен Извештај, прв после отворањето на преговорите на 19 јули оваа година, кој според него е објективен и ги потврдува реформите и напредокот.
Од аспект на вкупната подготвеност, оценката за нашата земја за 2022 година е „добро ниво на подготвеност“. Кога станува збор пак за напредок, генералната оценка е дека во околу 90 отсто од областите, имаме делумна или добра подготвеност. Извештајот оценува дека Северна Македонија го има задржано темпото на напредок и има подобрување во 23 од вкупно 43 области, односно поглавја, додека во останатите 20 области има ограничен или помал напредок“, посочи Маричиќ.
Тој рече и дека процесот на скрининг се одвива континуирано.
„Бидете уверени дека сите наоди и препораки во Извештајот ќе ги дискутираме заеднички и ќе ни користат како основа за ажурирање на Националната програма за усвојување на првото на ЕУ заедно со правото на ЕУ кое е презентирано на објаснувачките состаноци. Овој документ до крајот на годинава ќе биде ревидиран и ќе биде основа за подготовка на преговарачките позиции на земјата“, истакна Маричиќ пред народните избраници.