Вицепремиерот за европски прашања, Бојан Маричиќ, денеска во Брисел имаше состанок со комесарот на ЕУ за соседство и проширување Оливер Вархеји, на кој разговараа за процесот на скрининг, за следните активности во процесот на преговори и за актуелната политичка ситуација во Северна Македонија.

„Во вистински и клучен момент ја потврдивме европската перспектива на Северна Македонија. Сега е најважно да сме фокусирани на реформите и да останеме на европскиот пат. Тоа е наша обврска и задача која им ја должиме на граѓаните, да обезбедиме просперитет и напредок на земјата“, рече Маричиќ на состанокот.

Маричиќ го информирал Вархеји за скрининг состаноците и за подготовките за билатералниот скрининг, како и за посветеноста и мотивацијата на македонските институции во овој процес.

Еврокомесарот Вархеји на главниот преговарач со Унијата, Маричиќ, му посака успешен скрининг и испрати порака земјава да остане посветена на европската реформска агенда, како и на градењето на добрососедски односи со Бугарија.

Комесарот потенцираше дека сега е најважно сите во Северна Македонија да застанат зад европската иднина на земјата и да помогнат во процесот на преговори со Европската Унија, додавајќи дека тоа е процес кој е важен за иднината на земјата носи подобар живот за граѓаните.

На состанокот беше разговарано за последните подготовки за потпишување на договорот со Фронтекс во октомври, но и за економски теми, во пресрет на зимата која доаѓа и предизвиците со кои ќе се соочиме, предизвикани од енергетската и економската криза.

Денеска во Брисел продолжува скрининг состанокот за поглавје 24 – Правда, слобода и безбедност, кој ќе трае два дена, а веќе наредната недела продолжуваат состаноците за поглавје 23 – Правосудство и темелни права.