ЦИВИЛ МЕДИА направи опширно интервју со вицепремиерот за европски прашања, Бојан Маричиќ, на 17 август, во кое стана збор за клучните теми и политички процеси поврзани со македонскиот пат кон ЕУ, за придобивките и за тешките задачи што мора да се исполнат во тој процес. Тој одговори на прашања поврзани со потребата од уставни измени, како и за блокадите на процесот кои ги поставува опозицијата.
Во контекст на заложбите и значајниот придонес кој го дава ЦИВИЛ и медиумската платформа на организацијата, неизбежни беа прашањата што се однесуваат на дезинформациите и пропагандата која се служи со националистички наративи, чија цел е попречување на евроинтеграцискиот процес на земјата.
Што прави владата?
На прашањето што прави владата за да се соочи со овие предизвици и дали тоа е доволно, вицепремиерот не крие дека „дезинформациите и националистичките наративи се сериозен проблем со кој се соочуваме не само ние, туку и целиот регион.“
„Јасно е дека, поради геополитичката поставеност, ние сме држава која трпи странски влијанија на медиумската сцена, која има плодно тло за дезинформации и медиумски манипулации. Сведоци бевме на сите случувања поврзани со т.н. Француски предлог и дезинформациите кои и денес ги слушаме за Преговарачката рамка и евроинтеграцијата“, изјави Маричиќ за ЦИВИЛ МЕДИА.
Затоа, како што вели вицепремиерот за европски прашања, владата воспостави стратешки пристап и посветува многу внимание во оваа област. Тој вели дека владата на дезинформациите им се спротивставува со проактивност, отвореност и транспарентност. Но признава и дека е потребно да се направи уште многу.
„Овој предизвик бара стратешки пристап и многу внимание и како Влада на дезинформациите им се спротивставуваме со проактивност, отвореност и транспарентност во комуникацијата за нашето работење. Соработуваме и со организациите што се занимаваат со оваа тематика и низ проекти постигнати се значајни резултати во оваа област, но потребно е да се направи уште многу“, рече вицепремиерот Маричиќ.
Што прави граѓанскиот сектор?
Владата, вели Маричиќ, ја препознава работата на неколку реномирани граѓански организации и медиуми кои континуирано и несебично се залагаат да ги идентификуваат и разобличуваат дезинформациите. Воедно, тој ја истакна и важноста на поддршката од НАТО и меѓународните донатори.
„Во борбата против дезинформациите, нашата земја добива значајна поддршка од НАТО и веруваме дека и поддршката на меѓународните донатори може да помогне на медиумите и граѓанските организации во зајакнувањето на своите капацитети за борба против дезинформациите, бидејќи тие се главните актери и клучни играчи за успехот во оваа борба“, изјави вицепремиерот Маричиќ во интервју за ЦИВИЛ МЕДИА.
Главни дезинформации и пропагандни наративи…
Во своите одговори, вицепремиерот Маричиќ, издвои неколку дезинформации и пропагандни наративи кои го потресуваат и поларизираат македонското општество.
„Конкретно, дезинформациите за евроинтеграцијата на Северна Македонија, дека не се започнати преговорите со ЕУ, дека Францускиот предлог е обид за бугаризација, дека сме го изгубиле идентитетот и јазикот, направија големи поделби во македонското општеството, внесоа недоверба и несигурност во процесот, но и паника меѓу граѓаните“, рече Маричиќ во интервју за ЦИВИЛ МЕДИА.
… а кои се фактите?
Но тие дезинформации и лажни наративи се веќе разобличени по сите основи. Маричиќ наведе дел од нив и нагласи дека во овој момент најмалку што ни треба се „ дезинформации, кои имаат за цел да создадат атмосфера на страв и хаос, за постигнување геополитички и внатрешни политички цели.“
„Станавме членка на НАТО, ги започнавме преговорите со ЕУ, како Македонци, со заштитен македонски јазик и идентитет, имаме отворена можност да напредуваме брзо во процесот и да станеме членка на ЕУ со наредното проширување, кое во моментот се дефинира во Унијата и сега, кога постои ваков политички моментум најмалку ни требаат лажни вести и дезинформации, кои имаат за цел да создадат атмосфера на страв и хаос, за постигнување геополитички и внатрешни политички цели“, рече Маричиќ.
Последици и решенија
Според вицепремиерот за европски прашања, дезинформациите и националистичките наративи штетно ќе влијаат на општествените и политичките процеси, „особено во време на вакви глобални превирања.“
„Мислам дека е неопходно целото општество да биде свесно за сериозноста на проблемот и последиците и да се создаде една широка социјална група која одговорно ќе пристапи во надминување на овој предизвик“, повика вицепремиерот Маричиќ во интервју за ЦИВИЛ МЕДИА.
Останува заклучокот дека дезинформациите и пропагандата кои најчесто се служат со националистички наративи и предизвикување поделби, страв и несигурност во општеството, остануваат огромен предизвик во кој не е доволно да се вклучи само институциите, туку и целото општество, во сите сегменти.