Локалните власти во украинскиот град Мариупол предупредија на опасност од епидемии со оглед на ужасните санитарни услови во поголемиот дел од градот и фактот што илјадници тела остануваат да лежат под урнатините.

Се проценува дека околу 100.000 луѓе сè уште живеат во градот, и покрај неколкунеделните тешки борби и отсуството на централизирано водоснабдување.

Пред малку градскиот совет соопшти дека постои ризик од колера, дизентерија и ешерихија коли – бактериска инфекција која може да предизвика силна стомачна болка, крвава дијареа и откажување на бубрезите. Советот рече дека има неподносливи услови за живот кои ќе се влошат со загревање на температурите.

„Веќе температурата на воздухот достигна 20 степени. Моќни и смртоносни епидемии наскоро би можеле да избијат во градот — поради недостатокот на централизирано снабдување со вода и канализација, распаѓањето на илјадници трупови под урнатините и катастрофалниот недостиг на вода за пиење и храна“.

Градоначалникот на Мариупол, Вадим Бојченко, рече: „Окупаторите не можат да му обезбедат на постојното население храна, вода и лекови. Или едноставно не се заинтересирани за тоа. Тие ги блокираат сите обиди за евакуација. И без тоа, луѓето ќе умрат. На крајот на краиштата, сега во руинираните мариуполски згради има средновековни услови за живот. Потребна е итна и целосна евакуација“, предупреди тој.