Масимилијано Алегри и Јувентус ќе продолжат заедно и во наредната натпреварувачка сезона. Ова го нагласи Џузепе Марота, генерален директор на бјанконерите, за италијанската ТВ куќа „Медиасет“ во име на комплетното раководство на клубот.
Притоа изрази задоволство од досегашната работа на менаџерот со првата екипа која во изминатите две години освои две Скудета, два национални купа, еден Суперкуп на Италија и стигна до финале во Лигата на шампиони во 2015 година во кое загуби од Барселона.
„Дали сум сигурен дека Алегри ќе остане? – Јас би рекол дека ќе биде така бидејќи не постои никаква пречка за таков раплет. Од секогаш сме биле блиски со Алегри. Имаме извонреден меѓусебен однос“, рече Марота за „Медиасет“ со што, на некој начин, ги демантира неодамнешните пишувања дека Алегри, наводно, ги договорил сите детаљи со Арсенал.
Извонредниот однос не е единствената причина што го држи Алегри на клупата на „старата дама“. Во основа тоа се резултатите, а споменатите и тоа како одат во негова корист. Тој го презеде Јувентус во летото во 2014 година од Антонио Конте кој, пак, беше назначен за селектор на Италија.