Рафаел Надал и Роџер Федерер имаа по, речиси, еден час работа во Шангај за пласман во четврт-финале на претпоследниот Мастерс 1000 во сезоната пред завршниот во Лондон од 12 до 19 ноември. Шпанскиот ас, моментно водечки на АТП листата, за 63 минути го „реши“ Фабио Фоњини со 6:3, 6:1 за 14 триумф во низа и нареден дуел против Бугаринот Григор Димитров. Надал во Шангај атакува на трета титула во изминатите пет недели на тврда подлога на која не знаеше за турнирска победа цели три години. Постот го прекина на годинашното издание на Ју-Ес опен.
Лесна осминафинална задача имаше и Роџер Федерер. Швајцарецот остана 60 минути на централниот терен во Шангај колку што му требаа за елиминација на Александар Долгополов од Украина. Конечни 6:4, 6:2 за тенискиот маестро од Базел и за пласман во полуфинале ќе игра против Ришар Гаске кој, пак, славеше во француската пресметка со Жил Симон со 7:5, 6:7, 6:2.
Турнирот во Шангај се игра за награден фонд од 5,924,890 милиони евра. Наредниот од серијата Мастерс 1000 е во Париз (30 октомври до 5 ноември) по што ќе следуваат пресметките на најдобрите осум во сезоната во лондонска „О2 арена“.
АТП Мастерс 1000 во Шангај/награден фонд 5,924,890 милиони евра
Резултати/осминафинале
Надал (1., Шпанија) – Фоњини (Италија) 6:3, 6:1
Федерер (2., Швајцарија) – Долгополов (Украина) 6:4, 6:2
Троицки (Србија) – Изнер (12., САД) 6:4, 7:6
Гаске (Франција) – Симон (Франција) 7:5, 6:7, 6:3
Чилиќ (4., Хрватска) – Џонсон (САД) 7:6, 6:4
Рамос Винолас (Шпанија) – Штруф (Германија) 7:6, 6:4
Дел Потро (16., Аргентина) – А. Зверев (3., Германија) 3:6, 7:6, 6:4
Димитров (6., Бугарија) – Квери (10., САД) 6:3, 7:6