Матичните лекари го прекинуваат протестот – преку работни групи со Министерството ќе бараат решение на проблемите.
Министерството за здравство заедно со Здружението на приватни лекари ќе формираат работни групи на кои ќе се дефинираат конкретните чекори за подобрување на состојбите со кои се соочуваат со лекарите од примарното здравство. Ова било договорено на денешниот состанок помеѓу заменик министерот за здравство, Владимир Рендевски и претседателката на Здружението, Лилија Чолакова Дервишова.
„Во овој краток период откако ја преземав функцијата имав повеќе средби и со министерот за здраство и со Фондот за здравствено осигурување, она што го увидувавме во примарната здравствена заштита е дека навистина од 1463 медициски тимови во примарната здравствена заштита, околу 500, односно една третина се на работ на егзистенција. Практично добиваат едвај загарантирана минимална плата за тимот доктор/сестра“, рече Рендевски и најви дека што е можно поскоро ќе изнајдат решение за да бидат докторите и мотивирани и да останат да работат во интерес на пациентите.
Рендевски најави дека ќе се обезбеди минимална загарантирана плата и за докторите и сестрите кои едвај преживуваат со мал број пациенти, за да нема одлевање на медицинскиот кадар, ниту затворање на ординациите што ќе биде на штета на пациентите. Рамномерно ќе се обезбеди загарантирана минимална плата и за ние ПЗУ каде има и поголем број на пациенти, поради што вработени биле и повеќе тимови.
“Заеднички ги разгледавме и одредени казнени мерки на кои се залеа матичните лекари, а се изрекувани од ФЗО, имавме состанок во текот на денешниот ден со менаџментот на Фондот и договоривме во иднина да се гледа за некои помали, навистина административни грешки, казните да не бидат парични, туку да бидат во форма на опомена“, додаде заменик министерот за здравство, Владимир Рендевски.
Од Здружението на приватни лекари се задоволни од средбата. Велат протестот ќе биде прекинат.
„Јас ги изнесов сите наши забелешки. Апелиравме да се формираат веднаш работните групи, а заедно со Лекарската комора апелиравме во секоја работна група да има човек кој ги разбира и има позитивен став кон нашите барања. Очекуваме сето ова што беше кажано да стои, бараме да има континуитет во сите наши договорени барања и оние со претходниот министер за здравство, се со цел да имаме задоволни и мотивирани здравствени работници кои ќе работат за доброто на своите пациенти“, вели Чолакова Дервишова.
Утрово, 50-тина лекари од Приватните здравствени установи излегоа на протест пред подрачната единица на Фондот за здравствено осигурување во Велес. Останатите матични лекари, кои го поддржија протестот, денеска работеа само со итни пациенти.
На протестот се приклучија и приватните стоматолози.
Лекарите од приватното здравство се жалат на нискиот капитационен бод кој со години не бил покачен и покрај тоа шпто се зголемија трошоците за живот, како и минималната плата која согласно Закон ќе мора да им ја исплаќаат на техничарите и медицинските сестри.
Забелешки имаа и кон Фондот за здравствено осигурување од каде на почетокот на годинава им беа доставени договорни казни за административни пропусти детектирани уште пред пандемијата.
Од ФЗОМ на прашање на НоваТв велат дека од Здружението на приватни лекари не побарале средба за да се пожалат за казните. Оттаму додаваат дека согласно Договорите склучени со здравствените установи, каде таксативно се наведени и казнените одредби за непочитување на истиот, секој лекар точно знае на што треба да внимава за да не го прекрши договорот. Од ФЗО велат дека во изминатиот период ја олесниле казнената политика кон здравствените установи.
„Во текот на 2019 година врз основа на заеднички преговори со ЗПРЛМ, се склучија анекс на договори со кои беа драстично намалени договорните казни. Воведен е мораториум (мирување/ одлагање ) за изрекување на договорни казни за период од 01.01.2019 до 30.06.2019 година, по барање на надлежните комори и ЗПРЛМ, во текот на 2020 година, Фондот значително ги намали контролите во здравствените установи, со цел да излезе во пресрет на лекарите кои се справуваа со пандемијата со Коронавирусот“, велат за НоваТВ од Фондот за здравствено осигурување.
Додаваат дека зависно од висината на договорната казна, ПЗУ можат плаќањето да го остварат најдоцна до 12 месеци.
(Б.Божиновска)