Нема политика во разрешувањето на директорот на Клиниката за кардиохирургија д-р Сашко Јовев, за секој директор ќе има санкции, рече денеска министерот за здравство Фатмир Меџити, по вчерашното ненадејно разрешување на кардиохирургот кој го предводеше тимот кој ја изврши првата трансплантација на срце во државата. Разрешувањето предизвика бурни реакции и негодување во јавноста со прозивки до премиерот Ковачевски да го разреши министерот за здравство поради едностраниот потег.
Меџити на денешниот настан на Клиниката за ендокринологија рече дека повеќе детали новинарите ќе добијат на брифинг подоцна попладне. Д-р Јовев закажа прес-конференција во 12 часот.
Министерот за здравство вчера рече дека нема да толерира „директори кои седат и спијат по пет години, 10 години, и кои немаат никаков резултат“. Денеска пак, изјави дека се утврдени нерегуларности во работењето на Клиниката за кардиохирургија, откако стигнале информации до Државниот здравствен и санитарен инспекторат (ДСЗИ).
На инсистирања на новинарите за тоа што згрешил Јовев, со оглед на тоа дека е наградуван доктор и ја водеше првата трансплантација на срце, тој вчера рече:
„Тоа е кадар на коалицискиот партнер на СДСМ, тие ќе предложат друго име. Нема никој тука да биде бесмртен. Ниту јас, ниту другите, ниту директорите. Здравството е жива материја. Кој нема да сработи, ќе биде отпуштен од функцијата“.
Кардиохирургот Сашко Јовев лани беше меѓу добитниците на државната награда „Св. Климент Охридски“, највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност од јавен интерес во држвата. Преходно ја доби наградата за животно дело „Гемиџиите“ на Општина Велес, а беше и дел од тимот наградени со „13 Ноември“ на Град Скопје.
Првата трансплантација на срце беше изведена на 23 мај 2020 и оттогаш се направени осум пресадувања на срце.