Европратениците Едвард Кукан, Кнут Флекенштајн и Иво Вајгл, кои се медијатори на Договорот од Пржино потпишан во јули за излез од политичката криза во Македонија, велат претседателот Ѓорѓе Иванов и партиите треба да ја почитуваат волјата на граѓаните и да го прифатат оној кој формирал парламентарно мнозинство.
– Го повикуваме Претседателот и сите политички партии да ја почитуваат демократската одлука на граѓаните и да го прифатат договореното парламентарно мнозинство без понатамошно одложување. Како што постојано ние и еврокомесарот Јоханес Хан повторуваме, очекуваме нова влада базирана на инклузивност, реформи и меѓуетничка соработка, се вели во заедничката изјава.
Тие во исто време го повикуваат Иванов и партиите да се воздржат од изјави кои може да поттикнат немири во државата, и напоменуваат дека земјата мора да се врати на својот демократски пат.
– Последниот развој на настаните може да има значителен импакт врз европските перспективи на државата. Како што стојат работите, ние сме обврзани да му препорачаме на Европскиот парламент да до одложи гласањето за извештајот на земјата за 2016 година, потенцираат Кукан, Флекенштајн и Вајгл.
Реакциите по одлуката на Иванов не стивнуваат како од македонските аналитичари, така и од Меѓународната заедница, откако Иванов вчера рече дека нема да му го додели мандатот на лидерот на СДСМ, бидејќи преговарал за Платформа која била потпишана во друга држава, а со тоа се уривал суверенитетот на државата.
Инаку за истата Платформа на која како носител во јавноста се претстави ДУИ, преговараше и лидерот на ВМРО-ДПМНЕ, Никола Груевски но не успеа да состави Влада.
Денес и американскиот амбасадор, како и еврокомесарот Јоханес Хан побараа од Иванов уште еднаш да ја обмисли одлуката за да не ја турне земјата во подлабока криза.