Сведок изјави дека менаџерот на Волмарт отворил оган врз колегите вработени собрани во просторијата за одмор во супермаркетот. Во пукањето загинаа шест лица.
Вооружениот напаѓач бил мртов кога го пронашла полицијата, изјави началникот на полицијата Марк Солески. Нема јасен мотив за пукањето, во кое исто така се ранети четири лица кои се наоѓаат во болница.
Пукањето, кое се случи во американската сојузна држава Вирџинија се случило кога познатиот супермаркет Волмарт бил преполн со купувачи кои пазареле за Денот на благодарноста.
Очевидец на настанот која е вработена во Волмарт рече дека работниците се собрале во просторијата за одмор како што обично правеле пред да им почне смената.
„Го кренав погледот, а мојот менаџер само ја отвори вратата и почна да пука“, рече таа додавајќи дека „повеќе луѓе“ паднале на подот. „Тој не кажа ниту еден збор, не кажа ништо, само пукаше“, рече жената пред чии очи се одиграл настанот.
Таа потврдила дека пукачот, кој користел пиштол, бил вработен во Волмарт.
Во САД оваа година имаше дури 40 масовни убиства. Дефиниција за масовно убиство е кога се убиени најмалку четири лица, не вклучувајќи го убиецот.
Нападот во Волмарт се случи три дена откако едно лице отвори оган во ноќен клуб за хомосексуалци во Колорадо, убивајќи пет лица и рани 17. Претходно оваа година, земјата беше потресена од смртта на 21 лице претежно деца кога вооружен маж упадна во основно училиште во Тексас.
Пукањето во Волмарт ги врати сеќавањата на друг таков настан во Волмарт во 2019 година, кога вооружен напаѓач, според полицијата, насочен кон Мексиканци отвори оган во Ел Пасо, Тексас и уби 22 лица.
Извор: Асошиетед Прес