Американската технолошка корпорација Мета се согласи да плати 25 милиони долари во судска спогодба за да ја реши тужбата на Доналд Трамп за укинувањето на неговите профили на платформите на социјалните медиуми на Мета по нападот на Капитол на 6 јануари 2021 година.
Мета потврди дека ќе донира 22 милиони долари на претседателската библиотека на Трамп и ќе плати 3 милиони долари за правни трошоци.
Во јули 2021 година, Трамп ги тужеше Мета и нејзиниот извршен директор Марк Закерберг за наводно цензурирање на неговите профили на социјалните мрежи по нападот на 6 јануари, обвинувајќи ја компанијата дека е во дослух со демократски пратеници. Најновиот договор доаѓа во време кога Закерберг се обидува да ги поправи односите со Трамп, коментираат медиумите.
Извршниот директор на Мета присуствуваше на инаугурацијата на Трамп и повеќепати ја посети резиденцијата на претседателот Мар-а-Лаго. Покрај тоа, Мета донираше еден милион долари за кампањата на Трамп, ги заврши своите програми за инклузивност (DEI) и го смени системот за проверка на факти на социјалните мрежи кои беа предмет на критики на Трамп.
Закерберг неодамна во популарниот подкаст на Џо Роган изрази жалење поради претходната построга политика за проверка на фактите, велејќи дека таа „отишла предалеку“.