Не сакаме и не работиме за одвојување на Северна Македонија од Албанија на патот кон ЕУ. Работиме и силно се трудиме за двете земји што побрзо ги одржат првите меѓувладини конференции и тоа е една од причините за мојата посета, изјави претседателот на Република Албанија, Илир Мета, кој денеска е во посета на Република Северна Македонија.
Во врска со одвојувањето на Албанија од Северна Македонија, Мета рече дека за ова многу важно прашање за двете земји, разговарал и со претседателот Стево Пендаровски.
– Имавме многу добро разбирање и ќе ги интензивираме нашите напори. Ќе бидеме трпеливи и ќе работиме поблиску и посилно, изјави Мета.
Претседателот на државата, Стево Пендаровски, денеска го прими претседателот на Албанија, Илир Мета, кој е во посета на земјава, и на средбата разменија мислења за севкупните билатерални односи меѓу двете држави.
– Притоа, беше изразено задоволство од нивниот позитивен развој, преку конструктивна соработка и размена на посети на највисоко ниво. Република Северна Македонија и Република Албанија, беше констатирано на средбата, преку посветеноста на добрососедските односи, даваат силен придонес за просперитетот, стабилноста и безбедноста на регионот, како и за неговата европска перспектива. Двете држави, како сојузници во НАТО, даваат свој придонес и во одбраната на вредностите на евроатлантската заедница, соопшти Кабинетот на Пендаровски.
Во контекст на аспирациите за членство во Европската Унија, двајцата претседатели, како што се наведува во соопштението, ја констатираа потребата од деблокирање на процесот и скорешен почеток на пристапните преговори на двете држави за членство во Унијата што, според нив, ќе има позитивен придонес за севкупниот напредок и стабилноста на регионот.
Претседателот Пендаровски упати честитки по повод изборот на Република Албанија за непостојана членка на Советот за безбедност на Обединетите нации во периодот 2022-2023 година.
Мета денеска треба да се сретне и со претседателот на Собранието, Талат Џафери.