Дуелот меѓу македонскиот и шпанскиот вицешампион почнува во 17,30 часот во ВИП арената во СЦ „Борис Трајковски“
Металург во ноември пред две години ја совлада Ла Риоха во Скопје со 29:28 во ракометната Лига на шампиони. Оттогаш ниту составот е ист, ниту амбициите на тимот од Автокоманда, но што остана исто е вербата, пред се, кај Лино Червар. Иако Шпанците попладнево ќе гостуваат како првопласирани во групата Ц, а „металурзи ќе влезат во мечот од последната позиција, хрватскиот тренерски стручњак смета дека ривалот од Логроњо е непредвидлив меѓутоа не е непобедлив. Мечот почнува во 17,30 часот во ВИП арена на СЦ „Борис Трајковски“.
„Имаме млада екипа, мора да имаме трпение, свесни сме дека нè очекува долг пат. Враќање нема. Ла Риоха е добро вкомпонирана екипа, малку ѝ недостасуваше да слави против Барселона. Многуте грешки и промашени зицери, сепак, ја чинеа пораз. Нивната надворешна линија е за респект, знаат одлично да се трансформираат и да постигнуваат брзи и лесни голови“, вели Червар.
Денешниот дуел е втор за Металург пред неговите гледачи во ЛШ во оваа сезона. Го совлада Елверум со 18:17 во првото коло по што следуваа два пораза на гости (од Татран Прешов – 27:22 и од Чеховски медведи – 25:21). Во нив прикажаа различни полувремиња, по едно добро и лошо, што поради младоста и неискуството на екипата во формирање и не е дотолку изненадувачки.
„Ла Риоха, сепак, може да е победи. За тоа ќе мора да дадеме сто отсто од нашите можности и да ги сведеме грешките на минимум. За нас тие се огромен предизвик со кој полесно ќе се справиме со помош на гледачите“, додаде Червар кој денеска не може да смета на левото крило Марчец и левиот бек Младеновиќ.