Производителите на метански уреди за возила нудат конвертирање на дизел-возилата со што се овозможува нивен погон на смеша од дизел и метан. На тој начин дизел-возилата стануваат значително поекономични и, што е уште поважно, поеколошки.
„Според производителите со инсталирање на DDF систем дизел + метан на конвенционално
дизел-возило се добива до 12 процента намалена емисија на CO2 гасови, до 40 проценти
помала емисија на ПМ честички и до 22 процента заштеда на трошоци за гориво“, се наведува во соопштението на „Макпетрол“.
Пренамената на комбиња и товарни возила на дизел + метан, велат од компанијата, не ги намалува перформансите на возилото и е погодно за приватни и за службени возила. Во дописот се укажува дека кај комбињата со тежина до 3,5 тони замената на дизел-горивото е 50 проценти, додека кај средно тешките до 10 тони и тешките товарни возила над 10 тони замената на дизел-горивото изнесува 45 проценти.
Од „Макпетрол“ препорачуваат дека со конвертирање на DDF системот на конвенционално дизел- озило и, истовремено, со користење на биодизел и биометан значително може да се намали емисијата на штетни гасови од секојдневната употреба на возилото со ниска и брза инвестиција.
Како пример се посочува Јавното транспортно претпријатие на Виена кое од 60. години на минатиот век работи на приспособување на флотата автобуси на течен нафтен гас како алтернативно гориво.
„Моментално сите автобуси на претпријатието „Wiener Linien“ се целосно на гас. Во 2005 година компанијата МАН во соработка со „Wiener Linien“ разви и претстави нова генерација на мотор со течен нафтен гас со емисија на штетни гасови што е за 50 проценти под еуро 5 стандардот, што е на сила од 2008 година. Истовремено, со новиот мотор е намалена потрошувачката на гориво и емисијата на CO2 во споредба со постарите мотори, а, притоа, е постигнато и намалување на бучавата. За ваквите вложувања компанијата е добитник на наградата за животна средина од градот Виена во 2006 година“, велат од македонскиот нафтен гигант.
Град Скопје веќе набави 33 нови нископодни автобуси на гас метан од германскиот производител МАН со еуро 6 стандард. Според постигнатата цена на тендерот еден единечен автобус чини 263.000 евра, а зглобните автобуси по 334.000 евра. Според најавите на градските власти со новите еколошки автобуси годишно ќе се прави заштеда од 25.000 евра за гориво и ќе испуштаат 0,04 грама на километар ПМ честички, што е и до 90 проценти помалку загадување.
„Според податоците на Државниот завод за статистика во 2018 година, на нашите патишта имало 3.201 автобус, од кои 3.006 биле на нафта, а само 40 користеле бензин – гас. На патиштата во Европската Унија имало околу 770.000 автобуси, од кои 30 проценти биле во Полска и во Италија. Просечната старост на автобусите во Европската Унија била 11,4 години. Најнови автобуси има Австрија со просечна старост од 5,4 години, а најстари автобуси има Грција со просечна старост од 20,4 години. На нашите патишта во 2018 година според Државниот завод за статистика имало 3.200 автобуси со просечна старост од 18,7 години. Од нив, над 81 процент биле постари од 10 години“, стои во соопштението на „Макпетрол“.