НОВАТВ преку Агенцијата за Катастар го провери сиот имот на и околу улицата „Салвадор Аљенде“ и откри дека луксузните згради кои ја опркружуваат зградата со број „69“, каде што живее поранешниот директор на тајната полицијата Сашо Мијалков, се мнозинството или изградени или во сопствевност на фирмата „Архи ДОО“.
Салвадор Аљенде „69“, според информациите кои новинарите ги добија од МВР, е зградата којашто можете да ја видите на горната фотографија, или зградата преку која беше приведен истражителот на СЈО којшто, според министерот за внатрешни работи Оливер Спасовски, сакал да фотографира објект каде што живее поранешниот директор на Управата за безбедност и контраразузнавање Сашо Мијалков.
НОВАТВ трагаше по сопственикот на делот од зградата кадешто престојува Мијалков. Разговаравме со неколку станари од соседството на оваа зграда кои сакаа да останат анонимни, и тие ни потврдија дека Мијалков живее тука.
„Мијалков е од задната страна на зградата која ја фотографиравте. Гледате, го чува полиција. Има и двор отпозади. Дворот не можете да го видите, но јас можам од мојот балкон. Во него има и скулптура од зеленило, како да ја наречеме, зелена грмушка во форма на балерина, веројатно во чест на сопругата ја оформиле“, рече сосетката од улицата со зградите позади оваа. Подоцна и новинарот на НОВАТВ влезе кај една вистинољубива сосетка и самите го видовме дворот на Мијалков.
Според сведоци, поранешниот шеф на тајната полиција престојува овде. Според писмени докази, тој е на улицата „Народен Фронт“ во Капиштец, односно тоа е адресата од неговата лична карта. И по имотот кој го имаше пријавено како поранешен прв човек на УБК, Мијалков нема стан во зграда на оваа адреса. Таа зграда е единствената којашто ја обезбедува полиција. Соседите се пожалија дека се вознемирувани од големото обезбедување на Мијалков.
Зградата посочена како место каде живее поранешниот шеф на тајната полиција и братучед на Никола Груевски има две чуварници. Едната е на улицата „Салвадор Аљенде“, а другата од горната улица, Тодор Александров каде што се наоѓа луксузниот резиденцијален комплекс на Водно, „Панорама“. Оттаму Мијалков, според сведоците, влегувал во своето престојувалиште.
„Секое утро доаѓаа многу обезбедување со едно куче-вучјак и проверуваат по колите, не знам што прават, веројатно е проверка за бомби. Тоа е без исклучок секое утро. Понекогаш овде има и по 25 луѓе обезбедување“, велат соседи од соседната улица каде што е втората чуварница.
НОВАТВ од еден од балконите од соседните згради успеа да добие инсајт во дворот на престојувалиштето на Саш Мијалков. Зградата во која тој престојува до неа има зграда близнак. Не е јасно дали тие згради се дел од „Панорама“ комлексот или не. Тие имаат заеднички двор, којшто според она што ни го раскажаа соседите, го користи само Мијалков бидејќи другата зграда е празна. Од балконот можеа да се погледнат луксузни простории кадешто Мијалков и семејството уживаат во базен, сауна и теретана. НОВАТВ нема да ги објави фотографиите кои ги поседува заради заштита на изворот, бидејќи нивното објавување ќе го лоцира и добронамерниот сосед.
Комшилук изграден од Камчев, речиси поседуван од Камчев
НОВАТВ преку Агенцијата за Катастар го провери сиот имот на и околу улицата „Салвадор Аљенде“ и откри дека луксузните згради кои ја опкружуваат зградата со број „69“или комплексот „Панорама“ каде што живее поранешниот директор на тајната полицијата Сашо Мијалков, се мнозинството или изградени или во сопствевност на фирмата „Архи ДОО“. Оваа фирма, пак, ја поседуваат компанијатата на бизнисменот Јордан Камчев и фирма на неговиот зет за сестра, Мето Стојчевски. Претходно, на местото на зетот, ортак на Камчев во „Архи ДОО “ беше контроверзната „Ексико“. На улицата „Салвадор Аљенде“ во близината на Мијалков и Панорама Резиденс, според документите од катастарот, тие градат хотел и станбени единици во илјадници метри квадратни површина.
Земјата на којашто Архи ДОО ја изградила „Панорама“ претходно му припаѓала на еден друг познат скопски бизнисмен, кој откако не можел да добие дозволи за градба, ја продал на „Архи ДОО“, во тоа време поседувана од „Ексико„ и „Орка Холдинг“.
НОВАТВ ги доби сите документи од Катастарот кои ги откриваат сопствениците на имотите околу зградата со број „69“, но не и таа зграда. Можете да проверите станови кои се во сопственост на други лица на „Салвадар Аљенде 69Б на пример, но не и на А или само 69. Овие лица не се поврзани со Мијалков, но на бројот 69 има две идентични згради. „Архи ДОО“ поседува илјадници метри квадратни на овој рид. Иако во катастарот не може да се добие точна потврда чија е зградата во која што престојува Мијалков, НОВАТВ смета дека е релеватно да се знае дека до Мијалков, над Мијалков и околу Мијалков речиси се е поседувано од компанијата поврзана со неговиот кумашин Јордан Камчев. Колку имот имаат „Архи ДОО“, „Ексико“ и Јордан Камчев и како Камчев го освои Водно, Зајчев Рид и Центар, читајте во наредните денови на НОВАТВ.
(Поврзана сторија)
Мистериозната„Ексико“
Јордан Камчев годинава во рангирањето на магазинот „Форбс“ беше прогласен за најбогатиот Македонец. Неговиот имот драстично се зголеми по доаѓањето на новата власт во 2006 година, актуелната ВМРО ДПМНЕ. Тој преку Орка Холдинг поседува хотели, градежни компании, млекарници, мелници, земјоделски комбинати, текстилни фабрики, ресторани, болници. Некои од овие компании добиваат тендери вредни десетици и десетици милиони евра. А во многу од овие компании тој често настапува заедно со мистериозна офшор компанија од Лугано, Швајцарија која индиректно може да се поврзе и со неговиот пријател Сашо Мијалков. Зделките на овие фирми често се поврзуваат со злоупотреба на моќ, трговија со влијание и корупција. А секаде каде што е Камчев, таму е „Ексико“, компанијата со непознат сопственик.
Во март 2014, опозициската партија СДСМ ги обвини премиерот Никола Груевски и неговиот братучед и поранешниот шеф на тајната полиција, Сашо Мијалков дека имаат удел во фирмата Ексико, офшор компанија инкорпорирана во Лугано во Швајцарија, како и дека ја „држат во заложништво целата економија во Македонија“.
Ексико и Орка Холдинг се појавуваат заедно во бројни државни зделки или пак купуваат акции во истите компании. Двете компании имаат значајна добивка од владините тендери и владино спонзорираните зделки.
На пример, Ексико и Орка Холдинг заедно го поседуваат ЕК-ОР, кој преку серија на трансакции кои инволвираат офшор компании, купи парцела на главниот плоштад во Скопје. Владејачката партија ВМРО-ДПМНЕ преку општина Центар овозможи промената на урбанистичките планови за да започне со градба осумкатниот хотел ИБИС.
Ексико е сопственост на T&MJ investments Ltd. Во минатото оваа фирма беше менаџирана, помеѓу другите, и од двајцата номинирани директори Емилио Бинда и Капрани Умберто. Истите луѓе се појавуваат како директори на фирмата од Панама, Тасига Корп, која од Мијалков ја купи неговата компанија Миртланис СРО регистрирана во Прага, Чешка. Емилио Бинда, едновремено беше и неизвршен член на управниот одбор во фирмата која денеска е познатта како КАРА АД, во сопственост на Орка Холдинг и семејството Камчеви.
Миртланис СРО, основана во март 2014, поседува плац од 15,280 метри квадратни во скапата област на Прага наречена Велеславин. Подоцна Мијалков ја префрли сопственоста на Тасига Корп. Во исто време, тој беше шеф на тајната полиција и беше обврзан да го пријави сопствеништвото во Анти-корупциската комисија. Тој тврдеше дека не го пријавил, бидејќи вредноста била премногу мала. Исто така тој ја префрли вредната земја на свое име.
Долгогодишниот директор на фирмите на Мијалков, Горан Гацов, остана директор и откако заврши трансферот на сопственоста.
Ексико и ОРКА исто така поседуваат заедно плац од 4,514 метри квадратни во ексклузивната населба Водно, само два километри од центарот на Скопје, дом на дипломати и многу богати луѓе. Плацот беше дел од контроверзниот скандал со прислушкување.
Во февруари 2015, стотици прислушкувани снимки од наводни разговори од разни функционери, вклучувајќи го и премиерот Никола Груевски и некои од неговите министри, беа објавени од Зоран Заев, лидерот на главната опозициска партија, СДСМ, која тврдеше дека ги добила од „свиркачи“ во тајната македонска полиција. Снимките вклучуваат повеќе од половина милион разговори, кои се одвиваат од 2007 до 2013 година.
Во една од снимките која го вклучува гласот на Груевски и тогашниот министер за транспорт и врски, Миле Јанакиески, се дискутира како илегално да се обезбеди легална градба на земјиште кое треба да се пренамени како градежно. Опозицијата тогаш објави документи кои потврдуваат дека 17,000 метри квадратни земја на елитното Водно е купена како лозје од фирма од Белизе чиј директор е кумот на Груевски (11,500м2), како и компаниите Ексико и Кара АД.
Од промената се офајдија не само Ексико и Орка Холдинг, туку и Ристо Новачевски, добар пријател на Груевски и државен службеник. Подоцна, овие две фирми ја купија „Сирах Инжинеринг“, формирана на Белизе чиј директор беше кумот Ристо Новачевски, па земјата прејде во нивна сопственост.
Орка Холдинг и Ексико заедно поседуваат акции во градежната компанија, Бетон-Штип, млекарата Здравје-Радово, земјоделските компании Жито Полог, Пелагонија ЗК Скопје АД Петровец.
Бетон-Штип доби седум тендери кои вредат 55 милиони евра како дел од огромниот контроверзен проект „Скопје 2014“. Земјоделскиот комбинат ЗИК Пелагонија доби 6.5 милиони евра во државни субвенции во последните четири години откако станаа акционери.
Ексико и Орка Холдинг исто така поседуваат 50 проценти од компанијата Масив Констракшн. Тие поседуваат 3,528 метри квадратни во општината Аеродром.