Сашо Мијалков, обвинет во судскиот предмет„Плацеви на Водно“ денеска се појави на судското рочиште. Тој беше во изолација поради коронавирус, па судијата Илија Трпков на почетокот на судењето го праша дали е во добра здравствена состојба и, откако доби потврден одговор, почна главната расправа на која е присутен и бизнисменот Јордан Камчев, кој, заедно со Мијалков, се бранат од слобода откако апелациските судии ги ослободија од притвор со приложена гаранција од над 11 милиони евра.
Пред да влезе во судницата Мијалков беше прашан од новинарите “кој е рецептот за милионите”, на што одговори дека нема рецепт.
Груевски е првообвинет во овој судски предмет и му се суди во отсуство.
Според обвинението, во периодот од јуни 2006 до октомври 2012 година, Груевски како лидер на партија наместо да прикаже пари како примени донации во ВМРО-ДПМНЕ, за себе прибавил 1,3 милиони евра (79 972 140 денари), а потоа ги пуштал во оптек и купувал парцели на Водно. Станува збор за земјиште на кое имало шума, а кое со промените во Генералниот урбанистички план (ГУП) било пренаменето во градежно.
Покрај имотот на Водно, обвинението опфаќа и два стана во главниот град и две парцели во Крушево за кои обвинителството тврди дека се прикривал вистинскиот сопственик. Освен Груевски, обвинети се и бизнисменот Орце Камчев, неговата мајка Ратка Куновска-Камчева, Сашо Мијалков, Ристо Новачевски и Ненад Јосифовиќ. Првообвинет е експремиерот Никола Груевски, кој избега во Будимпешта и нему му се суди во отсуство.
Камчев, неговата мајка, како и Новачевски и Јосифовиќ се товарат за перење пари, додека Мијалков е обвинет за помагање во делото перење пари.
(С.М.)