Новоизбраниот претседател на Црна Гора, Јаков Милатовиќ денеска ќе положи заклетва во црногорскиот Парламент и ќе стапи на должност претседател на државата, а присуството на неговата инаугурација го најавија лидери на повеќе земји од регионот, меѓу кои и претседателот на Хрватска, Зоран Милановиќ. Присуството на претседателот на Србија, Александар Вучиќ се уште не е официјално потврдено.
Според црногорскиот Устав, новоизбраниот претседател положува заклетва на денот кога му истекува мандатот на неговиот претходник, а церемонијата на инаугурација ќе почне во 12 часот.
По завршувањето на собраниската седница, на платото пред црногорскиот Парламент ќе се одржи церемонија на свечен воен поздрав.
Поради доаѓањето на голем број високи функционери, нивото на безбедност во Подгорица е подигнато на повисоко ниво, патиштата во центарот на градот ќе бидат затворени за сообраќај во поголемиот дел од денот, додека полицијата најави зголемено присуство на сите раскрсници.
Милатовиќ доминантно го победи Мило Ѓукановиќ во вториот круг од претседателските избори на почетокот на април, освојувајќи 60 отсто од гласовите. Уставот на Црна Гора предвидува претседателот на државата да се избира на непосредни избори на пет години.
Извор: МИА