Новоизбраниот претседател на САД, Доналд Трамп, најави можност да ја укине опцијата за одобрување статус на привремено заштитени лица (Temporary Protected Status – ТПС), кој сега го имаат околу милион луѓе.
Марибел Идалго избегала од родната Венецуела пред една година со својот едногодишен син, патувајќи низ Панама и Мексико, за да стигне во САД. Таа живеела во САД кога администрацијата на претседателот Џо Бајден објавила дека на Венецуелците ќе им биде понуден ТПС, кој им овозможува на луѓето што веќе се во САД да останат и легално да работат, ако нивната татковина се смета за небезбедна.
Луѓе од 17 земји, вклучувајќи Хаити, Авганистан, Судан и неодамна Либан, во моментов ја добиваат оваа помош.
Но, новоизбраниот претседател Доналд Трамп и неговиот потпретседател Џеј Ди Венс ветија масовни депортации и предложија намалување на издавањето на ТПС што го опфаќаат повеќе од милион имигранти.
Трамп и Венс, за време на кампањата изнесоа неосновани тврдења дека Хаиќаните што легално живеат и работат во Спрингфилд, Охајо, како носители на ТПС, ги јаделе домашните миленичиња на своите соседи.
„Ќе престанеме масовно да го доделуваме статусот на привремено заштитени,“ изјави Венс во октомври на митинг во Аризона.
Најмалку 7,7 милиони луѓе избегале од политичко насилство и економски проблеми во Венецуела.
– Единствената надеж ми беше ТПС. Ме загрижува дека по сето што издржав со син ми за да стигнам овде, ќе ме испратат назад, рече Идалго.
Венецуелците, заедно со Хаиќаните и Салвадорците, се најголемата група корисници на ТПС.
Ова предизвикува голема загриженост, рече Ванија Андре, главен уредник на весникот „Хаитски Тајмс“. – Испраќањето на илјадници луѓе назад на Хаити не е опција. Земјата не е подготвена да се справи со насилството од криминалците и не може да ги апсорбира сите тие луѓе, додаде таа.
Одредбите на секретарот за внатрешна безбедност овозможуваат олеснување до 18 месеци, но во многу случаи се продолжуваат.
Федералните прописи дозволуваат ваквите одредби да се укинат пред истекот, но тоа никогаш не се случило.
Адвокатот Ахилан Т. Аруланантам, кој успешно го оспори обидот на Трамп за укинување на ТПС за неколку земји, нема сомнеж дека новиот претседател повторно ќе се обиде со тоа.
– Можно е некои луѓе во неговата администрација да сфатат дека одземањето на дозволите за работа на повеќе од милион луѓе, од кои многумина живеат во оваа земја со децении, не е добра политика. Но, ништо во биографијата на Трамп не сугерира дека би се грижел за тоа, изјави Аруланантам.
Судовите го блокираа укинувањето на ТПС за Хаити, Судан, Никарагва и Салвадор за време на првиот мандат на Трамп.
Секретарот за национална безбедност на Бајден, Алехандро Мајоркас, потоа ги обнови.
Американскиот парламент го воспостави ТПС во 1990 година, кога во Ел Салвадор беснееше граѓанска војна.
ТПС не е пат кон постојан престој или државјанство во САД, но подносителите на барање може да се обидат да го променат својот статус преку други имиграциски процеси.