„Во моментов сме соочени со уцена која утре со убави зборови ќе се обиде да ја амортизира и сегашната претседателка на Европската комисија Урсула фон дер Лајен“, коментира денес Антонио Милошоски од ВМРО-ДПМНЕ.
Тој рече дека досега многу видни лидери од Европа имале обраќање во македонскиот парламент, но без корист.
„Во Република Македонија досега се обратиле Хавиер Солана, Романо Проди, еврокомесарот Оли Рен. Сите имале одлични обраќања. Во Македонија сме имале такви одлични обраќања, од кои сме немале никаква придобивка. Во моментов сме соочени со уцена која утре со убави зборови ќе се обиде да ја амортизира и сегашната претседателка на Европската комисија Урсула фон дер Лајен. Го почитуваме нејзиното време но си го почитуваме и нашето достоинство и знаеме што е добро а што не е добро за Македонија и сметаме дека овој преседан каде што од земја членка се бара да се ревидира историја и да промени Устав за воопшто да може да почне преговори, и истите да бидат врзани со натамошни промени на учебници и историски личности, е понижувачки“, рече тој.
Милошоски го повтори ставот на партискиот лидер Христијан Мицкоски.
„За преговарачката рамка надлежен орган што ја прифаќа или одбива е Владата. Владата е уплашена од револтот на граѓаните и се обидува преку Собранието пратениците на владејачката коалиција да ги искористи како алиби за наводно прифаќање на францускиот предлог, за кој што Собранието нема надлежност. Расправата е сведена на информација а информацијата според Деловникот е најнискиот праг за расправа во Собранието. Мислиме дека е дури и понижувачки за самиот процес. Второ што Бујар Османи и Ковачевски немаат храброст да го објават е бугарскиот Протокол и реалната дискусија во јавноста ќе биде сведена на театрална козметика во македонското Собрание која што тие потоа ќе ја искористат за она што веќе го одлучиле да кажат „да“ на овој предлог кој што сметаме дека е штетен и ќе донесе само ретроградни политички процеси за историска ревизија во следните 10-15 години“, изјави Милошоски.
Пратениците на ВМРО-ДПМНЕ, како што нагласи, „аргументирано ќе го разобличат овој предлог и неговата штетност и ќе бидат против овој театрален обид Собранието да биде искористено како алиби за она за кое Владата на Ковачевски и Османи ќе каже „да“.
На прашањето какви заклучоци би прифатиле тој одговори дека заклучоци би имале смисла само доколку истите ги прифати Владата а имаат за цел да се направи корекција а не прифаќање на францускиот предлог. „Прифатлива е само корекција со која од францускиот предлог ќе се исфрлат билатералниот протокол и сите други уцени вклучувајќи ја и смената на Уставот кои што Македонија ќе ја внесат во еден ретрограден процес. Сите други заклучоци би биле про-форма, алиби“, изјави Милошоски. (С.К.)