По приемот и разговорите во Министерството за надворешни работи, Османи и Дендијас ќе одржат заедничка прес конференција со почеток во 10.30 часот.
Грчкиот министер за надворешни работи, Никос Дендијас, утрово пристигна во официјална посета на Република Северна Македонија, а во Министерството за надворешни работи веќе започна и средбата со министерот Бујар Османи. Информацијата ја потврдија од МНР.
По приемот и разговорите во Министерството за надворешни работи, Османи и Дендијас ќе одржат заедничка прес конференција со почеток во 10.30 часот.
Освен со министерот Османи, грчкиот министер Дендиас ќе се сретне и со претставници на македонскиот државен врв.
Инаку, грчкиот премиер Кирјакос Мицотакис ќе изврши реконструкција на неговата влада, соопшти денеска неговиот кабинет. Портпаролот на Владата, Јанис Иконому, ќе ги објави одлуките на Мицотакис во врска со промените во неговиот кабинет, се вели во соопштението на владата. Министерот Дендијас ќе го дознае новините во грчката влада за време на неговиот престој во Скопје.
Како што објавивме, предвидено е министрите Дендијас и Османи денеска да дискутираат за билатералните односи, во тој контекст напредокот во развојот на стратешкото партнерство, случувањата во регионот, посебно од аспект на неговите интегративни процеси, како и во случувањата пошироко во светот, со посебен осврт на најновите ангажмани во борбата за справување со пандемијата и состојбите во Авганистан.
Во делот на билатералната соработка, фокусот се очекува да биде ставен на интензивната динамика во средбите на највисоко ниво, унапредувањето на билатералната соработка и договорната состојба, кое уследи по потпишувањето на договорот од Преспа. Ќе се разговара и за спроведените активности согласно договорот, како од страна на Северна Македонија така и од страна на Грција.
Посетата на грчкиот министер за надворешни работи е во значаен период кога околностите на регионот и глобалните кризи налагаат заедничко координирање и дејствување меѓу двете соседните земји, со што се потврдува и унапредува нашето стратешко партнерство, се наведува во соопштението од Министерството за надворешни работи.