– Според најавите, а во согласност со законските надлежности, како министер за здравство на Република Северна Македонија, наскоро ќе ја формирам Комисијата за заразни болести. Таа е советодавен орган во чиј состав се истакнати експерти кои преку научни толкувања ќе ни овозможат ефикасно, навремено и ажурно да предлагаме мерки во согласност со епидемиолошката состојба. Непобитен факт е дека сегашните околности бараат засилено и координирано дејствување, врз основа на стручни и реалистични проценки, објави попладнево на својот Фејсбук профил министерот за здравство, Беким Сали.
Тој додава:
– Оттука, како министер најавував дека промените во ова тело ќе бидат во насока на проширување и дополнување на неговиот состав, со нови, професионални, кадри од повеќе области. Заради ефективност и успешност на овој процес, би сакал јавно да ги поканам и угледните професори д-р Драган Даниловски, д-р. Никола Пановски и д-р Вело Марковски да се приклучат како членови на Комисија за заразни болести и со тоа да придонесат во нејзината работа.
Чест и задоволство ми е јавно да го упатам повикот до овие експерти врз основа на внимателното следење на јавната дебата околу нивното можно вклучување во Комисијата за заразни болести. Гласот на науката е клучен во борбата против Ковид-19. Да го искористиме на најдобриот начин!
Доколку од какви било причини не се во можност да бидат дел од Комисијата за заразни болести, им упатувам отворена покана да бидат дел од мојот тим на советници, објави министерот Сали.
Но, се чини дека министерот за здравство ќе треба да бара нови кандидати за членство во новата Комисија.
Проф. д-р Драган Даниловски претходно не неговата Фејсбук страна изјави дека не би сакал да биде член на Комсијата за заштита од заразни болести и го образложи таквиот став.
И проф. д-р Никола Пановски, гостувајќи на една телевизиска емисија на национална телевизија во минатата недела, рече дека сега, по речиси две години, не би сакал да биде член на Комисијата за заштита на населението од заразни болести.
А проф.д-р Вело Марковски за НОВАТВ вечерва изјави:
– Првпат слушам. Објави на Фејсбук не вреди да се коментираат, ни рече проф.д-р Марковски.
Љубица Балабан