Министерство: Два денара поддршка за стабилизирање на откупот на сливи

0
By on ЕКОНОМИЈА, ПОЛИТИКА

По два денара поддршка за килограм сливи ќе добијат регистрираните откупувачи и трговци со цел стабилизирање на откупот на сливи, соопшти денеска Министерството за земјоделство, шумарство и водостопанство (МЗШВ).

МЗШВ воедно потсетува дека производителите, согласно годинашната Програма за финансиска поддршка во земјоделството, ќе добијат три денари субвенција.

– Финансиската поддршка за откупувачите ќе важи за индустриски сливи откупени до 15 септември 2018 година по цена не пониска од пет денари за килограм. Оваа субвенција ќе важи и за откупувачите кои ќе откупат свежа слива, но по цена не пониска од осум денари, наведува Министерството.

Во моментов, како што информира, над 20 компании откупуваат сливи.

– Континуирано го следиме откупот на сливи и повторно ги повикуваме земјоделците да не наседнуваат на партиски мотивирани протести. Работиме според законските овластувања и во интерес на земјоделците поради што изминатата 1,5 година воведовме системски мерки за поттикнување на развојот на земјоделството. Минатата година за 10 отсто ги зголемивме субвенциите за овошни насади вклучително и за сливите. По овој основ зголемени субвенции добија над 2.500 производители на сливи, за што беа исплатени 64 милиони денари, стои во соопштениетот од МЗШВ.

Пред корегирањето на Програмата за финансиска поддршка, субвенцијата за предадено овошје во преработувачки капацитет, вклучително и за сливите, беше два денара за килограм.

Овоштарите од делчевско на протест
Во меѓувреме, овоштарите од делчевско денеска излегоа на протест со цел, како што велат, до среда да се изнајде решение за проблемот со откупот на сливи во овој регион.
– Во текот на вчерашниот ден имавме состанок со претставници на Министерството и договоривме некои дополнителни мерки да се донесат, да биде дадено два денара на откупувачот и два денара на производителот, а се што ќе остане слива на нивата, да биде фомирана комисија од Министерството која на таа слива ќе и даде пет денари. Ако до среда тоа не се случи, протестите ќе продолжат, изјави Благојчо Митревски, производител од село Град.
Фото: МИА
За да не пропадне родот, овоштарите се согласни на тоа што им се нуди, но само доколку се оствари најавеното.
– Поради топлото време сливата веќе почнува да се расипува. Мора што побргу да се реагира, ниска е цената за откуп од пет денари и дополнителни два денара од државата, ама сепак ќе се согласиме и на тоа, рече овоштарот Трајчо Стоилов.
Како што истакна производителот Атанас Ангеловски од село Град, ова не е политички протест, туку протест на овоштарите. Овде не протестира ниту ВМРО ниту СДСМ, овде има овоштари кои сакаат да се реши проблемот со откупот.
– Ни кажаа од Министерството дека од среда ќе почнат да доаѓаат откупувачи и ако е вистина, ќе прекинат протестите, но ако не, од четврток ќе бараме проценители да вршат проценка на сливата која е падната на нивата, додава Ангеловски.
Утрово пристигна и соопштение од компанијата „Рудине“ која најавува дека од денеска почнува со откуп на модрата слива во Делчевско.
Share.