Според Министерството за информатичко општество (МИОА) со кое раководи Марта Арсовска Томовска, дополнителниот заменик министер Александар Кирацовски на денешната прес конференција ширел манипулации во јавноста.
Кирацовски обвини дека Арсовска Томовска заедно со ДУИ сами составиле тимови кои треба да ги внесат податоците од теренската проверка на Избирачкиот список, во специјална електронска евиденција за потребите на Државната изборна комисија.
– Со допис со назнака ИТНО, заведен под број 08/1-1593/1 од Државната изборна комисија, кој беше доставен во министерството на 01.04.2016 година во 16 часот и 20 минути, потпишан од претседателот на комисијата Александар Чичаковски, побарано е министерството ИТНО да обезбеди асистенција од вработени во министерството за информатичко општество и администрација со искуство во пренос на податоци од пополнетите прашалници, во апликација подготвена за таа намена. Во дописот може да се види дека со големи букви е назначено дека овие лица треба ВЕДНАШ да бидат ангажирани, односно ВЕДНАШ да бидат упатени во подрачните единици на Државната изборна комисија. Од страна на службениците во Министерството кои работат во писарницата веднаш е направен обид да се изврши достава на дописот до кабинетите на министерот, дополнителниот заменик на министер и државниот секретар, меѓутоа во тој момент ниту Кирацовски ниту луѓето од неговиот кабинет не биле на работа. Од тие причини, веднаш потоа дописот електронски е доставен до кабинетот на Кирацовски, на службена мејл адреса за што има и соодветен доказ, со што и самиот Кирацовски бил благовремено запознаен со содржината на барањето, се вели во реакцијата на МИОА.
Оттаму дополнително тврдат дека од моментот кога бил именуван, ниту Кирацовски ниту вработените во неговиот кабинет не почитувале работно време, доаѓале на работа кога сакаат и си оделе од работа кога сакаат а за тоа имало соодветни докази од евиденцијата на работното време во министерството.
Во однос на лицата кои Државната изборна комисија ги има побарано, државниот секретар на министерството за цело време на процесот, бил тој што ја координирал активноста за обезбедување на лица вработени во министерството и тоа по директни насоки и од Генералниот секретар на Државната изборна комисија, за што исто така постоеле соодветни докази (официјални дописи и СМС пораки од секретар до секретар директно).