Бездомникот Марем Демиров треба да биде опериран во текот на идната недела, откако тим од лекари од Психијатриската болница ќе направат проценка на неговата здравствена состојба. Откако НОВА го посети Демиров и ја објави сторијата, претставници на Министерството за здравство утринава го посетиле Демиров кој им кажал дека сака да се оперира и покрај тоа што веројатно ќе му бидат ампутирани нозете.
„Демиров рече дека сака да се оперира и на почеток на следната недела треба да се договори кога и каде ќе биде интервенцијата. За време на средбата се договоривме уште еднаш да се направи преглед и проценка на здравјето на пациентот од тим лекари во Психијатриската болница и потребната хируршка интервенција која ќе биде извршена во најскоро време“, потврдија за НОВА од Министерството за здравство.
Неофицијално, хируршката интервенција ќе биде извршена или на Клиниката за торакална хирургиј, од каде што беше претходно вратен или во Градската општа болница“8 Септември“.
По ова, според договорот меѓу министерството и болницата, бездомникот Муарем Демиров треба да биде згрижен во социјална установа.
Откако НОВА ја објави сторијата дека наместо да биде опериран Демиров кој со полураспаднати стапала шест месеци спиел пред болниците, е сместен во Психијатриската болница во Бардовци, надлежните се заинтересираа и отидоа да го посетат. Тој е таму три и пол месеци и во болницата тврдат дека не е психијатриски случај, туку дека му треба медицински третман за стапалата на кои има гангрена добиена од студ, по што треба да биде згрижен во социјална установа.
На почетокот на јуни веднаш откако јавно пред камерите екс директорот Зоран Спировски и министерот Арбен Таравари ветија дека ќе биде згрижен и опериран на клиниката, Демиров наместо да биде опериран на торакална хирургија бил однесен во Психијатриската болница во Бардовци.
Залудни биле напорите и укажувањата на раководството од Психијатриската болницата дека Демиров не е за таму и барањата до Министерството за здравство и Центарот за социјални работи да биде соодветно згрижен. Реагираше и Хелсиншкиот комитет од каде што побараа одговорност од министерот Таравари.
https://www.youtube.com/watch?v=aorbWBEUCxw