Министерството за здравство информира дека вакцинацијата против сезонски грип ќе почне на 22 ноември. За претстојната сезона се набавени 28.000 бесплатни вакцини за лица над 65 години, за лица со хронични заболувања, за деца на возраст од шест месеци до пет години, за бремени жени, како и за здравствените работници. Дополнително, набавени се и 21.000 комерцијална вакцина од Центрите за јавно здравство.
Од оваа година се подобрува и достапноста на бесплатните вакцини против сезонски грип, па покрај десетте Центри за јавно здравје, во вакцинацијата ќе бидат вклучени и три поликлиники: „Букурешт“, во Чаир и во Ѓорче Петров при Здравствен Дом Скопје.
Во Центрите за јавно здравје, вакцинацијата ќе се одвива во две смени, додека пак бесплатната вакцинација во трите поликлиники ќе се одвива во периодот од 14 до 18 часот. Заинтересираните лица можат да закажат бесплатна вакцинација од 18 ноември преку својот матичен лекар.
Како и во изминативе сезони, пикот на активноста на вирусот на сезонски грип се очекува во месец февруари. Вакцинацијата во ноември и во декември ќе обезбеди најголема заштита во периодот кога се очекува активноста на вирусот да биде највисока, а тоа е во месец февруари во 2020 година.