Министерството за финансии деновиве работи на доставување на формалното барање за користење на макрофинансиска поддршка од ЕУ, откако Владата донесе одлука и рок од 7 дена за тоа, на онлајн седница што се одржа во понеделникот. Што се однесува до износот што ќе се бара како и начинот и временската рамка на користење на средствата, од Министерството за финансии за НоваТВ, велат дека ова ќе се дефинира во понатамошните разговори со ЕУ.
Со доставувањето на формалното барање, Министерството за финансии ќе бара европските партнери да ја разгледаат можноста за користење на средства од овој инструмент од аспект на новонастанатата состојба која е резултат на енергетската криза и војната во Украина, а кои создадоа нови потреби за финансирање со цел да се заштити стандардот на граѓаните и ликвидноста на стопанството, наведуваат од Министерството за финансии потсетувајќи на донесениот сет од 26 мерки во вредност од 400 милиони евра.
Макрофинансиската поддршка од ЕУ е инструмент кој земјава веќе го користеше во 2020 и во 2021 година. Во услови на ковид –кризата Владата овие средства ги намени за буџетска поддршка.
Тогаш Европската Унија преку овој инструмент наменет за земји кои не се членки на ЕУ но се: кандидати или преговараат за членство во ЕУ или се земји кои граничат со земја членка на ЕУ, ни помогна со 160 милиони евра доделени последователно во две транши од по 80 милиони евра.
Првата транша од 80 милиони евра, Македонија ја доби во октомври 2020 година. Истата година до крајот на декември ЕУ ни исплати 32 милиони евра од Договорот за отпорност, од кои 24 милиони евра беа префрлени во Развојната банка каде беа алоцирани во бескаматни кредитни линии со грант компонента а 8 милиони евра ги искористи Агенцијата за вработување, за поддршка на активните мерки за вработување во 2021 година.
Втората транша од 80 милиони евра ЕУ ни ги испорача пролетта 2021 година.
По една година од тогаш, Владата сега повторно посегнува по овој инструмент кој е и во насока на реализација на клучните реформи бидејќи ефикасното и ефективното управување со јавните финансии е услов за пристапување на земјава кон ЕУ.
(М.Трпческа)