Министерството за правда ја повлече листата за помилување затвореници за Нова година која предизвика бурни реакции во јавноста.
Веста за повлекувањето ја објави заменик-министерот за правда, Агим Нухиу на социјалната мрежа Фејсбук:
„Ја информираме пошироката јавност дека иницијативите за помилување покренати од Управите на затворите се повлечени од страна на Министерството за правда! За каузата на правдата ние секогаш ќе дејствуваме!“, вели Нухиу во објавата.
Министерот за правда Бојан Маричиќ, претходно најави дека спорната листа ќе се прочисти.
„Оваа постапка не е јавна и не се објавува во јавност. Неблагодарно е да се објавуваат имиња во рана фаза затоа што станува збор за луѓе што се осудени и имаат свои надежи. Ние ќе се погрижиме да не се најде ниедно спорно име на списоците“, изјави Маричиќ.