Локалните избори на 15 октомври се одржаа во амбиент во кој преовладуваше натпреварувачки дух, а мисијата на ОБСЕ/ОДИХР во прелиминарните наоди и заклучоци оцени дека придонесоа за зајакнување на довербата во демократските процеси во земјата, соопшти денеска Делегацијата на ЕУ во Скопје.
Се посочува дека според наодите на ОБСЕ/ОДИХР за локалните избори, биле почитувани основните права на собирање и изразување, а се регистрирани и некои веродостојни тврдења за нерегуларности во предизборниот период.
– Властите треба ефикасно да ги спроведат препораките на ОБСЕ/ОДИХР, а Европската унија е подготвена да помогне во тој процес. Земјата се подготвува за вториот круг од изборите на 29-ти октомври и сите политички чинители треба да се однесуваат одговорно, а надлежните институции да обезбедат услови за кредибилен и транспарентен изборен процес. Европската унија ги охрабрува новоизбраните членови на локалните власти да придонесат за напредок во европската реформска агенда. Европската унија ќе продолжи да ја поддржува земјата во рефомскиот процес и на нејзиниот пат кон евроинтеграција, стои во соопштението од Делегацијата на ЕУ во Скопје.
Вчера, меѓународните набљудувачи од мисијата на ОБСЕ/ОДИХР и од делегацијата на Конгресот на локални и регионални власти при Советот на Европа, на прес конференцијата за прелиминарните наоди и заклучоци од изборите во неделата оценија дека „локалните избори во Република Македонија беа конкурентни, темелните слободи почитувани и покрај кредибилни наводи за прекршоци“
-Одржувањето на локалните избори придонесе кон зајакнување на довербата во демократскиот процес. Изборите се одржаа во конкурентно опкружување каде кандидатите генерално можеа да водат кампања без ограничувања, а темелните слободи на здружување и изразување беа севкупно почитувани, констатира ОБСЕ/ОДИХР.