Оливер Митковски, еден од актерите во претставата Ничија земја, која вчера требаше да се одржи во МНТ, а беше прекината од актерите во знак на поддршка за нивниот колега Владо Јовановски, на својот профил на социјалната мрежа „Фејсбук“ напиша дека нивната постапка не била со цел да влијаат на исходот на судските процеси, туку да се сврти вниманието на институциите и да ја вратат одлуката Јовановски да биде во куќен притвор, наместо во затворот во Шутка.
„Во случајов поради недостаток на вистински информации за мотивите на нашето дејствување а истовремено поради чувствителноста на политичката состојба во земјата пред се поради низата организирани криминални дејствија од 27 Април, јавноста со право шпекулира и бара одговори. Верувам дека на повеќето им се добро познати моите ставови во однос на владеењето на претходната политичка гарнитура, мојата осуда во однос на случувањата во собранието и мојата децениска борба за создавање на правна држава. Оттаму, нашата одлука не беше обид ниту да влијаеме на исходот на судските процеси, ниту да бараме амнестија за сторените дела. Напротив, сметаме дека доколку се докаже вината, Владо и сите останати учесници треба соодветно да бидат казнети, секој во зависност од тежината на стореното дело. Идејата беше да се сврти вниманието на јавноста и пред се на надлежните институции уште еднаш да ја преиспитаат својата одлука и да ја вратат првичната-домашен притвор. Сметаме дека во конкретниов случај, Владо има неколку олеснителни околности кои се доволни за оваа отстапка од страна на надлежните органи“, пишува Митковски.
Тој вели дека нивната одлука е емотивна, можеби по некои параметри и погрешна но во секој случај сметаат дека е човечна.
„Можеби ќе видите извесни контрадикторности во однос на целото мое претходно залагање, жалам што дел од моите пријатели и познаници ќе бидат разочарани но за мене одлуката да застанам зад оваа иницијатива е во суштина континуитет на мојата потреба да бидам не само колега туку пред се човек“, вели актерот.
Претходно ВД директорот на МНТ, Драган Спасов-Дац исто така на „Фејсбук“ се извини на публиката и најави дека сите актери кои требало да учествуваат во вчерашната претстава ќе бидат казнети.